Хөдөлмөр эрхлэлтийг дэмжих жилийн ажлын хүрээнд НХХЯ-наас албан бус хөдөлмөр эрхлэгчид, тэдний нийгмийн хамгааллын асуудлаар өнөөдөр хэлэлцүүлэг зохион байгууллаа. Хэлэлцүүлгээр худалдаа, үйлчилгээний салбарын нөхцөл байдал буюу задгай захын хөдөлмөрийн нөхцөл, эрүүл ахуйн асуудлыг хөндсөн байна. Мөн уг асуудлаар төр болоод ТББ-аас хийсэн шалгалт, судалгааны дүнг бодлого боловсруулагч, хэрэгжүүлэгч, нийгмийн түншүүдэд танилцуулан, цаашид анхаарах асуудлыг хэлэлцжээ.

Монгол Улсын нийт ажиллах хүчний 40 хувь нь зохион байгуулалттай салбар буюу албаны хэвшилд ажиллаж, үлдсэн  60 хувь нь өрхийн аж ахуй болон хувиараа хөдөлмөр эрхэлж  байгаа гэх судалгаа бий.  Үндэсний статистикийн хорооноос өнгөрсөн онд хийсэн “Хүн ам, орон сууцны тооллого”-ын дүнгээр 252.7 мянган хүн хувиараа хөдөлмөр эрхэлж, 117.8 мянган хүн өрхийн үйлдвэрлэл, үйлчилгээнд цалин хөлсгүй оролцож байгаагийн 80 гаруй хувь нь 25-55 насныхан буюу хөдөлмөрийн ид насныхан эзэлдэг аж. Хэлэлцүүлгийн үеэр албан бус хөдөлмөр эрхлэгчдийн талаар бодлогын хэрэгжилт, худалдаа үйлчилгээний салбар дахь албан бус хөдөлмөр эрхлэлтийн хөдөлмөрийн нөхцлийг сайжруулах асуудлаар бодлогын тодорхой зөвлөмж гаргахаар  оролцогч талууд тохиролцсон байна.