УИХ-ын Төсвийн байнгын хороо хуралдаж байна. Түүний эхэнд Монгол Улсын 2012 оны нэгдсэн төсвийн гуравдугаар хэлэлцүүлгийг хийлээ. Байнгын  хорооны дарга Д.Хаянхирваагийн танилцуулснаар Засгийн газраас анх өргөн барьснаас төсвийн нийт алдагдлыг 483 тэрбум төгрөг буюу 1,2 пунктээр бууруулсан байна. ДНБ 18 их наяд төгрөг байхаар төсөлд тусгаад байсныг 16,1 их наяд төгрөг болгон бууруулжээ. Төсвийн зардлыг 435,1 тэрбум төгрөгөөр бууруулахаар болжээ. Ирэх жил УИХ-ын сонгууль болно. Онцгой жил тул төсвийн заралд онцгой хяналт тавих ёстойг хуралдаан даргалагч хэлж байв. Энэ үеэр гишүүд өөр өөрийн тойргийн хөрөнгө оруулалт хасагдаагүй байгаа гэдэгт санаа зовж байсан юм. Гишүүн Ч.Улаан Сүхбаатар аймгийн Баруун-Урт сумын Засаг даргын Тамгын газрын төсөв болох 2,8 тэрбум төгрөг Засгийн газрын Хэрэг эрхлэх газрын даргын багцад үлдсэн эсэх, Д.Зоригт гишүүн нийслэлийн замын хөрөнгө оруулалт болох 48 тэрбум төгрөгийг аль замд оруулах зэргийг сураглаж байлаа.

Сангийн сайд С.Баярцогтын хэлснээр УИХ төсвийн хэлэлцүүлгийг маш хариуцлагатай хийжээ. Орлого, зарлага аль аль талыг танасан байна. Тэрбээр "Европын орнуудад нүүрлээд буй санхүүгийн хямрал ирэх жил Монголд нөлөөлж болзошгүй тул түүнээс сэргийлэх чиглэлд анхаарсан" гэлээ. Ингээд төсвийн орлогыг 600 тэрбум төгрөгөөр, зарлагыг 800 тэрбум төгрөгөөр, санхүүгийн эрхийг 100 тэрбум төгрөгөөр тус тус бууруулахаар болсныг мэдэгдлээ. Монгол Улсын түүхэнд төсвийг ингэж танаж байгаагүй гэнэ. УИХ өмнөх жилүүдэд дандаа зардал өсгөж байсан бол түүхэнд анх удаа том таналттай төсөв гаргах гэж буй нь энэ юм байна. Мөн Засгийн газрын Хэрэг эрхлэх газрын даргын багцад анх удаа лизинг хэрэглэхээр болжээ Тухайлбал, автомашины парк шинэчлэхэд лизинг хэрэглэх гэнэ. Үүгээр Төсвийн хуулийн гуравдугаар хэлэлцүүлгийг дуусгаж, чуулганы нэгдсэн хуралдаанаар хэлэлцүүлэхийг гишүүд дэмжлээ.

Байнгын хорооны хуралдаан үргэлжилж байна. Үүний дараа УИХ-ын чуулганы нэгдсэн хуралдааныг хуралдуулааар боллоо.