NBA-ын удирдлага болон Тоглогчдын холбоо урьдчилсан байдлаар тохиролцоонд хүрч, ойрын өдрүүдэд шинэ гэрээг батлах гэж буй. Харин энэ хооронд NBA-ын зүгээс багуудын тоглолтын хуваарийг боловсруулж байна. Шинэ улирлын тоглолтууд Зул сарын баярын өдөр буюу Монголын цагаар арванхоёрдугаар сарын 26-нд эхэлж, ирэх оны дөрөвдүгээр сарын 26-нд өндөрлөнө. Гэтэл энэ хооронд баг тус бүр 66 тоглолт хийх ёстой учир багууд гурван орой дараалан тоглох зэргээр тун шахуу хуваарьтай байх нь ээ. Энэ дүр зураг наанадаж, гурван удаа давтагдах аж. Тиймээс тоглогчдын ачаалал их байх тул плей-офф, цаашлаад аваргын төлөө тоглох боломжтой багууд сэлгээний тоглогчдод ихээхэн анхаарал хандуулж байна. Энгийн улиралтай харьцуулахад 10 хоногоор оройтож өндөрлөх улирлын тоглолтын дараа ч плей-оффын шатны тоглолтууд шахуу хуваарьтай үргэлжлэх юм. Харин финалын цуврал долоо дахь тоглолт зургадугаар сарын 27-нд болох боломжтой. Гэхдээ үүнээс хойш ердөө хоёрхон хоногийн дараа драфтын үйл ажиллагаа болох аж. Ажил хаялтаас шалтгаалан сар гаруйн хугацаа алдсан тул аялан тоглолтын тоог ч багасгасан байна. Нэг баг бүсийнхээ багуудтай 48 тоглолт хийх бол эсрэг бүсийн багуудтай ердөө 18 удаа тоглох нь.