Нийслэлийн цэцэрлэгийн багш нар өнөөдөр өглөөний 08.00-10.00 цагийн хооронд ажил хаялт зарлаж хүүхдүүдээ хүлээж аваагүй. Энэхүү ажил хаялтад 101 цэцэрлэг нэгдсэн байна.

Одоогоор бүх цэцэрлэг хүүхдүүдээ хүлээн авч байгаа аж. Сануулга ажил хаялтыг үргэлжлүүлэн нөгөөдөр буюу энэ сарын 30-нд ерөнхий боловсролын сургуулийн багш нар мөн хоёр цагийн ажил хаялт зарлах гэнэ. Мөн ирэх сарын 1-нд багш нарын төлөөлөл БСШУ-ын сайд Ё.Отгонбаяртай уулзахаар тохиролцсон байна. Хэрэв энэ уулзалтаар ямар нэг шийдвэрт хүрэхгүй бол ирэх долоо хоногоос хугацаагүйгээр ажил хаяхаа багш нар мэдэглээ.  Ерөнхий боловсрол, сургуулийн өмнөх боловсрол, их, дээд сургуулийн багш нарын цалинг хоёр дахин нэмэх хугацааг урагшлуулж, эхний ээлжинд 2012 оны нэгдүгээр сараас эхлэн цалинг 80 мянган төгрөгөөр нэмэгдүүлэхийг хүсч байгаа билээ. Монгол Улсад нийт 73 мянга орчим багш нар байдгаас 44 мянга нь ерөнхий боловсролын сургууль, 16 мянга нь сургуулийн өмнөх боловсрол олгох цэцэрлэг, үлдсэн нь их, дээд сургуульд багшилдаг юм байна.