Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдорж зарлиг гаргаж гурван хүнд цэргийн дээд цол хүртээлээ.

Хил хамгаалах ерөнхий газрын дарга, Хилийн цэргийн командлагч бригадын генерал Ц.Сэргэлэнд Ерөнхийлөгчийн 220 тоот зарлигаар хошууч генерал цол хүртээжээ. Түүнд Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдорж генералын мөрдэс, батламж гардууллаа. Мөн Зэвсэгт хүчний ерөнхий хянан шинжээч хурандаа Г.Энхбаатарт 221 тоот зарлигаар бригадын генерал, ШШБЕГ-ын дарга хурандаа М.Ганхүүд 222 тоот зарлигаар мөн бригадын генерал цол хүртээж мөрдэс гардууллаа.

Цэргийн дээд цол хүртэгсэд Монгол Улсын төлөө зүтгэхээ илэрхийлж Төрийн есөн хөлт цагаан тугандаа хүндэтгэл үзүүллээ. Үүний дараа тэд шинэхэн дүрэмт хувцсаа өмссөн юм.