Саяхан нээлтээ хийсэн “Гуталт муур” хүүхэлдэйн кинонд дуу оруулсан Холливудын жүжигчин Антонио Бандерас Австралид завиар зугаалж яваа гэнэ. Шинэ киноныхоо нээлтэд оролцохоор Сиднейд очсон жүжигчин өөртөө цаг гаргаж яваа бололтой. Харин “Гуталт муур” энэ удаа гутлаа хаа нэгтээ тайлж хаясан байсан нь сониуч зурагчны камерт өртжээ. “Шрек” хүүхэлдэйн киноны баатар “Гуталт муур” соло кареер хөөж, бие даасан киногоо гаргасан нь сүүлийн үед шуугиан тарьж байгаа билээ. “Гуталт муур” хүүхэлдэйн кинонд дуу оруулсан эртний хамтрагчид  болох жүжигчин Антонио Бандерас, Сальма Хайек нар киноны сурталчилгааны ажлаар Европоор хөндлөн гулд аялж, ногоон тивд очжээ. Тэд Австралид очихоосоо өмнө Лондон, Ром, Лос Анжелес, Мадридаар дайраад гарсан гэнэ. “Гуталт муур” Антонио Бандерас удахгүй Арабын султаны тухай өгүүлэх “Хар алт” хэмээх кинонд  Фрейда Пинтотой хамтран тоглох гэж буй ажээ.