Английн нийслэл Лондон хотноо болсон ATP World Tour Finals тэмцээний финалд “Швейцарь цаг” хочит Рожер Федерер Францын теннисчин Жо-Уилфред Цонгаг буулган авснаар зургаа дахь түрүүгээ авч, бас нэгэн дээд амжилтын эзэн боллоо. 2011 оныг сэргэлт, уналтын аль алинаар нь дүүрэн үдэж буй тэрбээр аваргын төлөөх тоглолтод 6-3; 7-6; 6-3 харьцаатай ялалт байгуулжээ. Тус тоглолт Федерерийн хувьд 100 дахь шигшээ тоглолт байсан юм.

Тэрбээр Базель болон Парист дараалан хоёр тэмцээнд аваргын цом өргөхдөө шигшээ тоглолтод мөн л Цонгаг буулган авсан. Энэ удаагийн улирлын төгсгөлийн, шилдэг наймын халз тулаанд түрүүлснээр Федерер Британийн Энди Муррейгээс дэлхийн чансааны гурав дахь байрыг нь булаан авч байна. Тэрбээр тоглолтын дараа “Энэ улирал ийм гайхалтай төгсч байгаад маш их баяртай байна. Жо өнөөдөр миний эцсийн эрч хүчийг минь шавхлаа” хэмээжээ.

ATP-гийн шигшээ тэмцээнд Иван Лендль, Пете Сампрас нарын адил таван удаа түрүүлээд байсан Федерер ийнхүү зургаа дахь түрүүгээ авч, рекорд амжилтын эзэн болж байна. ATP World Tour Finals-ын цом Федерерийн хувьд 70 дахь тэмцээний түрүү байлаа.

Тэмцээний хосын төрөлд Макс Мирный, Даниэль Нестор нар түрүүлсэн байна.

Гэрэл зургийг ЭНД дарж үзнэ үү.

Видеог ЭНД дарж үзнэ үү.