УИХ-ын чуулганы хуралдаан биднийг унтаж байх хооронд болов. Хуралдаан баасан гаригийн 23.50-д эхэлсэн бөгөөд амжиж батлах ёстой төсвийн хэлэлцүүлэг гишүүдийг багагүй чангалаад авав. Мэдээж ийнхүү амжиж хэлэлцэхгүй бол УИХ нь тарах хүртэл хариуцлагатай тул унтах цагаараа хуралдсан нь энэ. Бусад цагт хэрэгтэй, хэрэггүй юм ярьж чуулганы цаг бардаг гишүүд хүртэл “асууж хэлэх зүйлгүй” хэмээн ногоон гэрлээр хуулийн төслүүдийг ахиулж байв. Нойрмоглосон гишүүдэд ярих нь бүү хэл уншихад хүртэл төвөгтэй санагдаж буй бололтой. Гишүүн Х.Баделхан гишүүдэд хэлэлцэгдэж байсан хуулийн төслийн талаархи байнгын хорооны санал дүгнэлтийг уншиж танилцуулж байхдаа “1911 оны зургадугаар сарын 7-ны өдөр батлагдсан энэ хуулийн төсөлд дараах өөрчлөлт оруулахыг …” гэсэнд нь залхуу нь хүрсэн гишүүдэд тун ч соргог сонсогдож “хүүе зуун жилийн өмнөх хуулийн талаар яриад байна уу. Х.Баделханы санаа нь өөр газар явж байх шиг байна” хэмээн хөгжилдөв.

Өдөр дамнан хуралдахаар болсныг мэдсэн УИХ-ын дарга Д.Дэмбэрэл ч мэндчилгээ бэлтгээд амжсан аж. Тэрээр он солигдох мөчид Ерөнхийлөгчөөс мэндчилгээ хүргэдгийн адилаар 24.00 цаг болоход  чуулганы индэр дээрээс УИХ-ын гишүүдэд болон ард түмэндээ хандан Улс тунхагласны 87 жилийн ойн мэндчилгээ дэвшүүлээд авав. “Улс орны эдийн засгийн хөгжлийн суурь үндэс болох Мянганы зам, Бүсчилсэн хөгжлийн үзэл баримтлал, Мянганы хөгжлийн зорилт, түүнд суурилсан үндэсний хөгжлийн цогц бодлого, Оюу болон Таван толгойн ордыг ашиглах, шинэ бүтээн байгуулалт, “Монгол мал” зэрэг төрийн бодлогын баримт бичгүүд батлагдан гарч амьдралд хэрэгжиж байна” гээд л урсгаж байхад нь гишүүд “Манай дарга ч боломжоо ашиглаж байна шүү” гэж баясацгаав. Ерөнхийдөө ядралтын байдалтай танхимыг багахан сэргээхээ ч Д.Дэмбэрэл дарга мэддэг бололтой мэндчилгээнийхээ төгсгөлд “За, өөр үг хэлэх хүн байна уу. Гэхдээ баярын мэндчилгээ биш шүү. Хэлэлцэж байгаа хуулийн төслийн талаар” гэж хошигноод хурлаа үргэлжлүүллээ. Ийнхүү зүүд нойрны цагаараа ирэх оны төсвөө хэлэлцэж дуусахад цаг 02.30-ийг зааж байлаа.