Хөдөөд энэ өвөл мал үнэд орж, идшээ бэлтгэх гэсэн хотынхны хувьд ихээхэн мөнгөтэй очихгүй бол хоосон буцаж ирж мэдэхээр болжээ. Өнөөдрийн байдлаар Хөвсгөл аймагт шүдлэн үхэр 400 мянган төгрөгөөр үнэлэгдэж байгаа бол соёолон нь 450 мянган төгрөг, хязаалан нь 500 мянган төгрөгт хүрч буй юм байна. Адуу ч мөн өндөр үнэтэй байгаа гэнэ. Даага 400 мянган төгрөгөөс үнэлэгдэж буй ажээ. Нас нэг нэгээр нэмэгдэх тусам үнэ мөн өсч буй аж. Харин Улаанбаатар хотод “Хүчит шонхор” худалдааны төвд үхрийн нэг кг мах цул нь 5400 төгрөгөөр үнэлэгдэж буй бол ястай мах нь 4800 төгрөгөөр худалдаалагдаж буй юм байна.

Монголбанкнаас ирэх оны мөнгөний бодлогыг боловсруулах явцдаа инфляцийн төвшин, инфляци үүсэхэд суурь хүчин зүйл болж ирсэн бараа, бүтээгдэхүүний үнийн судалгааг гаргасан байсан юм. Түүгээр энэ өвөл махны үнэ буурахгүй улам чангарах төлөв гарсан гэсэн мэдээллийг өнгөрсөн есдүгээр сард парламентын сэтгүүлчдийн дунд “Төрөөс мөнгөний талаар 2012 онд баримтлах бодлого” сэдвээр сургалт зохион байгуулах үедээ онцолж байсан нь ийнхүү биеллээ олж эхлэв.

Ер нь жил бүрийн хаварт нийслэлд мах үнэд орж, нэг кг мах 6000 төгрөгт хүрдэг ч идэшний цагаар буурдаг. Харин энэ удаад махны үнэд бууралт харагдахгүй байгааг худалдаачид мөн онцолж байна.