Украины Ерөнхий прокурорын орлогч Ренат Кузьмин өнгөрсөн шөнө Интер телевизийн сувагт Украины Ерөнхий сайд асан Юлия Тимошенког депутат Евгений Щербанийн аллагад оролцсон хэмээн мэдэгджээ. Дээд Зөвлөлийн депутат Евгений Щербань эхнэрийн хамт Донецк хотын онгоцны буудалд 1996 онд алуулсан юм. Тэрээр «Антон» гэдэг санхүүгийн томоохон корпорацийн тэргүүн байсан юм.

Ренат Кузьмины хэлж буйгаар Щербанийг хөнөөсөн алуурчин хөлсөө Юлия Тимошенко болон тухайн үеийн Засгийн газарт ажиллаж байсан Павел Лазаренко нарын компанийн данснаас авсан гэнэ. Украины Прокурорын Ерөнхий Газар П.Лазаренког АНУ-д “мөнгөө угааж” байсан гэж үзээд АНУ-ын хууль хяналтын байгууллагад мөрдлөгө хийх тусламж хүссэн юм. П.Щербанийн аллагад сэжиглэн найман хүнийг 2002 онд саатуулсан аж. Тэдний гурав нь ялын дээд хэмжээ авч, үлдсэн тавыг нь шүүхийн шийдвэрээр буруутгажээ.