ОБЕГ, ЭМЯ, ХХААХҮЯ хамтран “Шувууны томуу, хүний томуугийн цартахалтай тэмцэх чадавхийг сайжруулах” төслийн нэгдүгээр шатны үйл ажиллагааг Дэлхийн банк, Европын холбооны санхүүжилтээр 2006 оноос нийслэл хот, Дорнод, Булган, Увс, Орхон, Дархан аймгуудад хэрэгжүүлсэн юм. Эрүүл мэндийн дэд сайд Ж.Цолмон Дэлхийн банкны Ази, номхон далайн баруун эргийн бүсийн орнуудын эрүүл мэндийн төслийн багийн ахлагч Ши Ёонтой уулзаж, “Шувууны томуу, хүний томуугийн цартахалтай тэмцэх чадавхийг сайжруулах” төслийн нэгдүгээр шатны үйл ажиллагааг дүгнэн ярилцаад төслийн 1-р шат амжилттай хэрэгжин дуусч байгаа тухай дүгнэж, 2-р шатны төслийг 2012 оны гуравдугаар сард эхлүүлэх талаар санал бодлоо солилцов.

Уг төслийн хүрээнд 4000 гаруй эмч, мэргэжилтнийг сургалтад хамруулж, 900000 ам. долларын тоног төхөөрөмжөөр эмнэлгийн байгууллагуудыг хангах арга хэмжээ авсны үр дүнд Дархан, Орхон аймгуудад вирүсологийн лаборатори байгуулж, шаардлагатай оношилуур, тоног төхөөрөмжийн иж бүрдлээр хангаж, 5-6 мэргэжилтнүүдийг сурган дадлагажуулжээ.

Төсөл хэрэгжсэн аймгуудын нэгдсэн эмнэлэг, бүсийн оношлогоо, эмчилгээний төв зэрэг байгууллагуудад өвчтөнийг хянах монитор, зөөврийн рентген, эхо, зүрхний бичлэгийн болон ариутгалын аппарат, зайнаас халуун хэмжигч, хувийн хамгаалах хэрэгсэл гэх мэт 210 гаруй сая төгрөгийн өртөгтэй эмчилгээ, оношилгооны багаж, төхөөрөмжийг нийлүүлсэн нь халдварт өвчнийг оношлох, эрт сэрэмжлүүлэх, хариу арга хэмжээ авах чадварыг эрс сайжруулсан байна.