Нийслэлийн хөдөлгөөнт эргүүлийн газраас “Амар тайван амьдралын төлөө” гэсэн уриатай нээлттэй хаалганы өдөрлөгийг ШУИС-тай хамтран зохион байгууллаа. Өдөрлөгийн арга хэмжээнд Нийслэлийн хөдөлгөөнт эргүүлийн газрын бие бүрэлдэхүүн,  СУИС-ын оюутан залуус оролцсон байна. Энэ үеэр оюутан залууст “Нийслэлийн хөдөлгөөнт эргүүлийн газар”-ын үйл ажиллагааг танилцуулж, залууст гэмт хэргээс урьдчилан сэргийлэх, архины хор хөнөөлийн талаар яриа ухуулга хийж, гэмт хэргээс урьдчилан сэргийлэх чиглэлээр санал асуулга авчээ. Нээлттэй хаалганы өдөрлөгийг нээж “Нийслэлийн хөдөлгөөнт эргүүлийн газар”-ын захиргаа удирдлагын хэлтсийн дарга Цагдаагийн ахмад Ч.Мөнхчулуун, Соёл урлагийн их сургуулийн Тайз дэлгэцийн урлагийн сургуулийн захирал, МУ-ын ардын жүжигчин, төрийн соёрхолт, доктор профессор Н.Сувд нар үг хэлсэн  байна.

Цагдаагийн ахмад Ч.Мөнхчулуун “Бид амар тайван амьдралын төлөө” уриан дор Нийслэлийн хотын иргэдийн амгалан тайван орчинд амьдарч ажиллах орчинг бүрдүүлэх, гэмт хэргээс урьдчилан сэргийлэх чиглэлээр, гэмт хэрэгтэй тэмцэх, нийгмийн хэв журам сахиулах, гэмт хэргээс урьдчилан сэргийлэх цагдаагийн үйлчилгээг иргэдэд түргэн шуурхай хүртээмжтэй хүргэх үүрэг гүйцэтгэн ажиллаж байна. Гэмт хэргээс урьдчилан сэргийлэх талаар дэлхийн нийтийн чиг хандлага байдаг. Тэр нь “Гэмт хэргийг үйлдсэний дараа илрүүлэх биш, үйлдэхээс нь өмнө урьдчилан сэргийлэх юм” хэмээн онцолсон  байна.

Харин төрийн соёрхолт жүжигчин Н.Сувд “Нэг нэгэндээ түшиг тулгуур болон хамтран ажиллаж, томоохон үр дүнд хүрнэ гэж бодож байна. Хууль эрх зүйн мэдлэгийг залуучуудад олгох, соёл урлагийн мэдлэгийг НХЭГ-ын бие бүрэлдэхүүнд олгох хамтын ажиллагаа аль алиндаа үр дүн өгсөн том ажил болно. Бидний хамтын ажиллагаа цаашдаа улам хүрээгээ тэлнэ гэдэгт итгэл дүүрэн байна” хэмээн хөдөлөөнт эргүүлийн алба хаагчдад ажлын амжилт хүсчээ.