Өмнөд Солонгосын пар­ламентийн отгон гишүүн Канг Сон Дунгийн гаргасан үйлдэл Солонгос даяар шуу­гиан тарьж байна. “Хан Ми FTA” буюу Өмнөд Солонгос АНУ хоорондын худалдааны хол­­бооны ээл­жит гэрээг Их хур­лаар бат­луулахгүй хэ­мээн хуурай нулимс асга­руулагчийг Их хурлын дар­га руугаа цац­сан Канг Сон Дунгийн уйлж байгаа зу­раг олон нийтийн дунд тө­дийгүй хэвлэл мэ­дээл­лийн хэрэгслийн гол сэдэв болоод байна. Түүнийг нулимс асгаруулагчаа цацсаны дараа Их хурлын танхимаас арав гаруй хамгаалагч хүчээр гар­гажээ. Канг Сон Дун ч гэрээг цуцлахгүй бол эндээс холдохгүй хэмээн гө­жиж эхэр татан уйлсан байна. Нэг талаас нь харахад түүний гаргасан үйлдэл бүдүүлэг мэт харагдана. Тэрбээр энэ үйлдлээ “Энэ бол ми­ний иргэдийнхээ төлөө гар­гасан нулимс” хэ­мээн тайл­барлажээ. Ер нь Япон, Өм­нөд Солонгосын пар­ла­ментын гишүүн, сайд на­рын гаргаж байгаа үйлдэл нэг л өөр. Үүний өмнө буюу өн­гөрсөн есдүгээр сард Япо­ны шинэ Засгийн газрын ху­далдааны сайд Ёшио Хачиро Фукушима АЦС-ийн бүсийг “Үхлийн хот” гэж хэлснийхээ төлөө албан тушаалаа өгч байсан санагдана. Энэ мэт жишээнүүдийг дурдаад бай­вал их олон зүйл бий. Мөн саяхан Евро бүсийн хямралаас үүдэл­тэйгээр Итали, Испани, Грек, Исламын Ерөнхий сайд нар огцорсон. Харин Монгол Улсад хариуцлага алдсан албан тушаалтнууд ажлаа хийж л байдаг. Ёстой чадаж бай­гаа юманд арга байхгүй гэ­дэг л болоод байгаа юм. Ма­най УИХ-ын гишүүдээс авлига л хээл хахуулийн хэрэгт орооцолдлоо л гэдэг. Нэг мэдэхэд хэрэг нь хаагдсан л байдаг. Тэд ч ажлаа хийсэн хэвээрээ ард түмэндээ хүнд­лэгдсээр л байна. Манайхан үнэхээр сэргэлэн хүмүүс юм даа. Харин гадны орнуудад төрийн алба хашиж байгаа хүмүүс нь дэндүү шударга, үнэнчээсээ болж ажлаа өгөөд байгаа хэрэг. Тэд ма­най УИХ, ЗГ-ийн сайд нар шиг сэт­гэхүйтэй байсан бол ажлаа хийсээр байх нь мэ­­дээж. Тэгэхээр УИХ-ын ги­­шүүд гадаад, дотоодод явах­­­даа тухайн улсынхаа пар­ламентын гишүүдтэй уул­­­заж туршлагаасаа ху­ваал­цаж байх хэрэгтэй. Нэгэнт л эрх мэдэл байгаа юм чинь өөртэйгээ ижил хүмүүст тус­лахад юу нь болохгүй байв гэж. Өмнөд Солонгосын пар­ламентын гишүүн Канг Сон Дунд манай УИХ-ын гишүүд захидал бичиж, сэтгэлийг нь засвал сайн сан.