Саяхан өвөрмонголчууд хоёр бөхт тэмээгээ Гиннесийн номд бүртгүүлжээ. Тэгээд 555 атан тэмээ сойж, уралдаан зохион байгуулж, Сайханталыг нүргээсэн их наадам зохион байгуулсан байна. Хос зогдор сагсалзуулж ширээ бөх солбиулсан улаан хүрэн атан тэмээд талыг бүрхэж чухам олны нүд хужирласан их уралдаан болжээ. Тал бүрхэн тэшүүлсэн тэмээдээс хэний ат түрүүлэх нь чухал биш, Өвөрмонгол, хоёр бөхт тэмээ хоёр Гиннест бүртгүүлэх нь чухал байжээ. Тун удахгүй дэлхийн онцлогуудыг бичдэг тэр номд энэ тухай орох бололтой.

Өвөрлөгч нартай өрсөлдөх дуртай, тэгсэн хэрнээ өөрт байдаг бүхнээ тэдний нэр дээр Гиннест орчихоор араас нь нэхэн шаралхдаг манайхан удахгүй мянган тэмээ цуглуулж бүрртгүүлнэ гэж өвлийн их ажлаа орхих вий дээ. Уртын дуу, морин хуур, хөөмэй, монгол дээл, үндэсний бөх гээд хамаг бүхнээ урд хөршийн нэр дээр бүртгүүлсэн хойно даагаа нэхдэг улс магадгүй л юм. Өнгөрсөн намар гэхэд хадлан тарианы ид үеэр 6000 гаруй эрчүүдээ зодоглуулж, Энэтхэгийн 34 хуруутай хүүтэй хамт Гиннест бүртгүүлээгүй юү. Яг түүн шиг.