Сумогийн их дэвжээнээ монгол бөхийн уран мэхийг гайхуулж “Мэхний их дэлгүүр” хэмээх тодотгол авч байсан УИХ-ын гишүүн, Кёкүшюзан Д.Батбаяр саяхны нэгэн арга хэмжээнд өөрийгөө “Би бол хөлснөөс төрсөн дэлхийн Монголын тэрбумтан” гэж тодорхойлжээ. Өнгөрсөн 20 гаруй жилийн хугацаанд Монголоос төрийн мөнгөөр хөлжиж тэрбумтан болсон нь л олон болохоос хөлс хүчээ шавхаж Монголоор зогсохгүй дэлхийн тэрбумтан болсон жишээ ховор тул эрхэм гишүүний үг цугласан олныг алмайруулаад авсан сурагтай. Арга хэмжээнд хүрэлцэн ирсэн зочид ч “Ийм үгийг хөлс хүчээ гаргаж явсан хүн л хэлэхээс. Өөр бусад хүн хэлэхгүй шүү” хэмээжээ.

Үнэхээр ч сумогийн их дэвжээнээ Монгол Улсын нэрийг анх цуурайтуулсан нь тэр. Түүний гаргасан замаар сумогийн их аварга Асашёорюү Д.Дагвадорж, Хакухо М.Даваажаргал нар замнаж, өнөөдрийн их амжилтад хүрсэн гэдэгтэй хэн ч маргахгүй биз ээ.