УИХ-ын Эдийн засгийн байнгын хороо үргэлжлүүлэн хуралдаж байна. Тус хуралдаанаар Нийслэлийн газар өмчлөл, эзэмшүүлэхтэй холбоотой асуудлаар мэдээлэл сонссон юм. УИХ-аас 2002 оны зургадугаар сарын 22-нд Газрын тухай хуулийг батлан гаргаж, хэрэгжих хугацааг 2003 оноос зааж өгч байжээ. Түүнээс хойшхи хугацаанд иргэд, аж ахуйн нэгжүүдийн хувьд газраа өмчлөх, эзэмших харилцаанд шилжжээ. Энэ оны гуравдугаар улирлын байдлаар нийслэлийн хэмжээнд 88138 иргэн 4801 га газрыг өмчилсөн. Мөн энэ оны тавдугаар сарын байдлаар  шинээр 177 га газрыг 3741 иргэнд эзэмшүүлсэн гэсэн мэдээллийг өглөө.
 
Түүнчлэн нийслэлийн Газрын албаныхан Улаанбаатар хотын хэмжээнд 9890 га нөөц газар байгааг тогтоож, суурьшлын шинэ бүсээр зарлажээ. Нөөц газарт Төмөр замын 64-ын гарам, Хурганы аж ахуй, Өлзийт хороолол, Ингэт толгой зэрэг газрууд багтаж байна. Улаанбаатар хотын иргэдийн хувьд мөн зуслангийн газрыг гэр бүлийн хэрэгцээний зориулалтаар эзэмшдэг. Тухайлбал, нийслэлийн Сонгинохайрхан, Сүхбаатар дүүргийн хэмжээнд зулсангийн 19 аманд 9722 иргэн газар эзэмшиж байгаа гэнэ.

Газрын тухай хуульд нийслэлийн иргэн нь Монгол Улсын аль ч нутаг дэвсгэрт газар өмчлөх эрхтэй хэмээн тусгасан тул авто зам дагуух газруудыг улаанбаатарчуудад эзэмшүүлэхээр төсөл боловсруулан байна. Ийм газруудын тоонд Төв, Өвөрхангай, Сэлэнгэ, Хэнтий зэрэг аймгуудыг нэр заан нэрлэсэн юм.