Урт гэгчийн хоёр том автобус нэг нэгнийхээ ард орохгүйг хичээн урсгал сөрж, хажуу талыг нь шүргэх шахам хурдална. Буудал дээр байгаа автобусны ард зогсохгүйг хичээн буудлаа хэтэрч зогсоно. Зарим нь ч бараг зогсохгүй. Их хотын түгжрэлтэй замын хөдөлгөөн дунд эгээ л Шумахер мэт хурдална. Алдарт Дакар раллигийн жолооч нар ч ингэж уралдахаасаа айна шүү дээ. Тэр их элсэн дунд онхолдвол эргэж босох гэж “дажинтай” юм болох учраас. Харин манай жолооч нар зоригтой. Өөрөөс нь гадна 40 гаруй хүн тэр автобус дотор явж байгаа шүү дээ.  Гэтэл ганцаарханаа уралдаж байгаа мэт л хурдална. Дотор нь байгаа хүмүүс хурдлах тоолонд хойшоо, урагшаа болж, нэг нэгнийхээ хөл, “гар”-ан дээр гишгэлнэ. Ууртай нэгэн нь заамдаж байхад, уургүй нэгэн нь үглээд дуугүй болох. Гэтэл хэргийн эзэн жолооч нь утсаар яриад явж байх. Тэр их хурдан давхиж байх даа шүү дээ. Хөгшин настай хүмүүс нь нэг гараараа бариул, нөгөө гараараа залуусаас зуурна. Хөгшчүүлийн түшиж байгаа залуус нь залхсан уу, зайгаа барин алга болох. Сандал дээр хүүхдүүд нүдээ анин “хэвтэж”, хөгшин настай, жирэмсэн эхчүүдэд суудал тавина л гэж байхгүй. Ард ийм байдал өрнөж байхыг алдарт “нисгэгчид” мэдэхгүй. Ядаж байхад хурдтай явж байгаа автобусанд зорчигч урагшаа, хойшоо сэгсчиж байхдаа кондуктор авгайг мөргөвөл бөөн юм болно. Аятайхан яваачээ гээд загнана. Дээрээс нь бүр барилцаж авахыг нь яана гээч.

Ингэж хурдлах тоолонд жолоо­чийн халаасан дахь хэд нь нэмэгддэг болохоор “хааз”-аа гишгэхээс татгал­зана гэж байхгүй гэс эн үг. Нэг рейсийг гүйцээхийн тулд нэг компанийн жолоочтойгоо “чи, би”-дээ тулан хэрэлдэж буудал алгасан давхилдана. Бүр ямар сайндаа “микро” шиг “Дөрвөн зам буух хүн байна уу” гэж асуугаад буудал алгасч давхиж байх вэ дээ. Сүүлдээ бүр том оврын автобусанд сууж байгаагаа ч мартаж орхино гээч. Өнгөрсөн жил жижиг оврын тээврийн хэрэгсэл жолооддог байсан хүмүүсийг сургаж том оврын автобус жолооддог болгосны гор нь одоо л гарч байна. Өнгөрсөн таван сарын дотор нийтийн тээв­рийн хэрэгсэлд зорчиж байгаад гэмтсэн дуудлага 10 гаруй бүртгэгджээ. Өнгөрөгч наймдугаар сард таван хүн нийтийн тээврийн хэрэг­сэлд дайруулж нас барсан ч гэх мэдээлэл байна. Хот хоорондын зорчигч тээврийн хэрэгслийг согтуугаар жолоодсон тохиолдол өнгөр­сөн хоёр сарын хугацаанд 20 гаруй бүртгэгдсэн гэх.

Мөн зарим кондуктор үнэ тариф баримтлахгүй, сурагч хүүхдүүдээс илүү мөнгө нэхнэ. Нэр бүхий зарим компаниудын нийтийн тээврийн автобусаас энэхүү үйлдлийг илрүүлж, мөнгөн торгууль оногдуулжээ. Басхүү маршрут зөрчдөг нь ихээр илрэх болжээ. Энэ оны арваннэгдүгээр сарын 10-ны байдлаар иргэдээс 820 гомдол санал ирүүлсний ихэнхийг буюу 241 нь маршрут зөрчсөн гэх гомдол байна.

Нэг иймэрхүү хар мөр дагуулсан “хэзээ” бариандаа орох нь мэдэгдэхгүй уралдаан үргэлжилсээр. Энэ уралдаанд шүүгч гэж байхгүй. Гагц хохирогч л гэж байх. Харин хэзээ хэн яаж шүүх нь, хэзээ барианд орох нь одоо ч эргэлзээтэй.

Үйлчилгээ нь байж болох хамгийн муу төвшинд хэрнээ хурд нь хамгийн эцсийн хязгаарт очсон нийтийн тээврийг өөрчилмөөр цаг болжээ. Ямар сайндаа автобусанд суух гэж байсан хоёр жуулчныг хаалгаар орохоос өмнө хөдөлж нэг нь унасан тохиолдол ч гарч л байсан. Аливаа улс орны хотын соёлыг нийтийн тээврээс нь хардаг гэтэл манайд энэ соёл хамгийн муу төвшинд байна. Монголын автобуснаас унаад гэмтэхээ шахсан жуулчин нутагтаа очоод юу гэж ярьсан бол гэж бодохоор…..