Нийслэлийн хүүхдийн төлөө газартай хамтран МУИС-ийн оюутнууд нэг өдрийн хоолны мөнгөө асрамжийн газрын хүүхдүүдэд хандивлахаар болж, сарын аян өрнүүлэхээр болсон тухайгаа мэдээллээ. МУИС-ийн МКС-ийн III дамжааны хоёр ангийн нийт 60 хүүхэд халамж, асрамжийн төвд амьдарч байгаа төгсөх ангийн оюутнуудад дэмжлэг үзүүлэх санал санаачилга гарган, “Оюутан бидний нэг өдрийн хоол ирээдүйг гэрэлтүүлнэ” уриатай сайн үйлсийн аяныг эхлүүлж байгаа аж. Цаашид МУИС-ийн 18 мянган оюутныг энэ аянд нэгдэхийг уриалж байгаа гэв. Нэг оюутан өдөрт 2000-5000 төгрөгний хоол иддэг гэж тооцож, нэг оюутнаас тэр хэмжээний хандив цуглуулж байгаа ажээ.

Түүнчлэн асрамжийн газарт амьдарч байгаа ерөнхий боловсролын сургууль төгсч, их, дээд сургуульд элсэн орох 14 оюутныг сонгон, тэдэнд их сургуульд буюу өөрсдийн сургууль болох МУИС-д элсэн ороход туслах зорилгоор хүссэн хичээлээр нь давтлага өгч туслах гэнэ. Мөн эдгээр 14 хүүхэд МУИС-д элсэн орох шалгалтад тэнцвэл сургалтын төлбөр болон дотуур байрны төлбөрөөс чөлөөлөх саналыг сургуулийн удирдлагуудад хүргүүлсэн байна. Учир нь асрамжийн газраас насанд хүрээд гарч байгаа хүүхдүүд нь тодорхой орлого байхгүй учраас сургалтын төлбөр болон дотуур байранд амьдрах мөнгөний асуудалтай тулгардаг учраас эдгээр хүүхдүүдийг сонгож авснаа оюутнууд хэлж байсан.  Аяны хүрээнд Хүүхдийн төлөө газрын харьяа Хүүхэд асран хүмүүжүүлэх төв, НЗДТГ-ын дэргэдэх Хүүхдийн сургалт хүмүүжлийн тусгай төвийн 11 дүгээр ангийн хүүхдүүдэд хамрагдах гэнэ.