Шүүхээр шийдвэрлэгдэж байгаа гэр бүлийн маргаан жил ирэх тусам өсчээ. Гэр бүлийн тухай хуулиар эцэг, эх байх эрхийг нь хассан тохиолдол сүүлийн таван  жилд 42 удаа гарсан ажээ. Тухайлбал, 2007 онд гурав, 2008 онд 12, 2009 онд 16, 2010 онд зургаа гарсан бол энэ оны эхний хагас жилд таван удаагийн тохиолдол гарсан байна. Сүүлийн таван жилд нийслэлд 15 хүн эцэг, эх байх эрхээ хасуулсан бол Дорнодод ес, Дархан-Уулд  тав,  Сэлэнгэ, Ховд, Өвөрхангайд тус бүр хоёр, Архангай, Булган, Орхон, Өмнөговь, Говьсүмбэр, Дорноговь, Хэнтий аймагт тус бүр нэг хүн эцэг, эх байх эрхээ хасуулсан байна.  

Түүнчлэн шүүхээс хуулийн дагуу эцэг тогтоосон тохиолдол сүүлийн таван жилийн байдлаар 1675 бүртгэгджээ.

Гэр бүлийн маргааны 77.3 хувь нь гэрлэлт цуцалсан хэрэг бөгөөд жил ирэх тусам нэмэгдэх төлөвтэй байна. Гэрлэлт цуцлалт Улаанбаатарт хамгийн их буюу нийт  таван жилийн дүнгээр 7069 байгаа бол Орхон, Дархан-Уул, Хөвсгөл зэрэг аймгуудад бусад аймагтай харьцуулахад нэлээд өндөр хувьтай  байдаг аж. Энэ оны эхний хагас жилийн байдлаар нийслэлд шүүхийн журмаар гэрлэлт цуцалсан тоо 918 гэр бүл байгаа аж. Түүнчлэн хүүхдийн тэтгэлэг албадан гаргуулсан тохиолдол 1866 байгаа нь гэр бүл цуцлалтаас хүүхдийн эрх зөрчигдөж байгааг мэргэжлийн хүмүүс онцолж байна.