Монгол Улсаас ӨМӨЗО-ны Хөххотод суугаа Ерөнхий консулын газар, Монголын оюутны холбооноос өнгөрсөн бямба гаригт тус хотод сурдаг монгол оюутнуудын дунд уламжлалт “Дэвжээ” урлагийн наадмыг зохион байгуулжээ.  “Дэвжээ 2011” уралдаан цэнгээнт наадамд Монгол Улсаас Өвөрмонголын их сургууль, Өвөрмонголын Аж үйлдвэрийн их сургууль,Багшийн их сургууль, Анагаахын их сургууль, Хөххотын Монгол дунд сургууль, Үндэстний туршилтын бага сургуульд сурч буй оюутан сурагчид ав,яс чадвар, авхаалж самбаагаа сорин өрсөлдсөн байна. Уг урлагийн наадмын үеэр оюутан сурагчид сургууль сургуулиараа баг болон  мэндчилгээ, дуу, уран уншлага, бүжиг,  асуулт хариулт, гэрийн даалгавар, чөлөөт сэтгэлгээ зэрэг төрлөөр өрсөлджээ. 

Өвөрмонголын их сургуулийн оюутнууд тэргүүн байр, Хөххотын Монгол дунд сургуулийн сурагчид дэд байр, Аж үйлдвэрийн их сургуулийн баг гуравдугаар байр эзэлж, Анагаахын их сургуулийнхан тусгай байр эзэлсэн байна.