
Гишүүн С.Бямбацогт сайдад хандсан асуулгадаа “Үйл ажиллагаа явуулж буй дулааны цахилгаан станцууд нь улсын онцгой объект бөгөөд орон нутгийн ард иргэд, аж ахуй нэгжүүдийг дулаанаар хангах үүрэгтэй. Дулааны станц нь 20-30 жилийн тэртээ баригдаж, өмч хувьчлалаар хувьд шилжин үйл ажиллагаа явуулж ирсэн ч тоног төхөөрөмж нь элэгдэлд орж, хүчин чадлаа бүрэн ашиглаж чадахгүйн улмаас хөлдөлтийн байдалтай өвөлжиж ирсэн хоёр аймаг бол алс баруун хязгаарын Ховд, Увс аймгууд юм. Дээрх аймгуудын дулааны хүндрэлийг шийдэх үүднээс Монгол Улсын 2011 оны төсөвт тодорхой санхүүжилт суулгаж, шинээр дулааны эх үүсвэр барьж байгуулахаар болсон билээ” гээд уг асуудалтай холбогдуулан Монгол Улсын Их Хурлын тухай хуулийн долдугаар зүйлийн 7.1.13, 33 дугаар зүйлийн 33.1.2 дахь заалтыг тус тус үндэслэн Эрдэс баялаг, эрчим хүчний сайд Д.Зоригтод дараах асуулгыг тавьсан байна. Үүнд:
1. Дээрх аймгуудад дулааны цахилгаан станц байгуулах шийдвэр нэг өдөр гарч, холбогдох төсвүүд тусгагдсан ч хэрэгжилт нь эрс тэс ялгаатай буюу Ховд аймгийн станцын хувьд хийгдсэн зүйл бараг байхгүй байгааг тайлбарлана уу. 2012 ондоо багтаан ашиглалтад оруулах боломж бий юу?
2. Ховд аймгийн дулааны станц нь 1986 онд баригдсан бөгөөд 2005 онд хувьчлагджээ. Ингэхдээ тухай үед ашиглагдаж байсан салбар болон магистрал шугамуудыг хамтад нь хувьчилснаас үүдэн шинээр баригдах цахилгаан станцад тус шугамыг ашиглах боломжгүйд хүрээд байна. Мөн шугамууд муудаж, элэгдсэн байгаа. Энэ асуудлыг хэрхэн шийдвэрлэх гэж байна вэ. Төрийн мэдэлд эргүүлэн авах тал дээр юу хийх вэ?
3. Ховд аймгийн хуучин дулааны станц нь гурван зуухтайгаас одоогийн байдлаар нэг нь ажиллаж хоёр дахь нь засварт орсон, гурав дахь нь ашиглагдахгүй байна. Дөрөв дэх зуухыг шинээр оруулж ирсэн ч суурилуулах байр байхгүйн улмаас ажиллаагүй ба нүүрсний хувьд ердөө 20 хоногийн нөөцтэй байгаа талаар мэдээлэл ирсэн. Ард иргэдийн аж амьдрал, орон нутгийн хувьд онцгой ач холбогдолтой уг объектын хувьд энэ асуудалд хэрхэн анхаарч, ямар арга хэмжээ авч хэрэгжүүлж байна вэ. Ховд хотын хувьд өвөлжилтийн бэлтгэл ажил хэр сайн хангагдсан гэж үзэж байна вэ?
4. Ховд хотын агаарын бохирдол, түүнийг бууруулахын тулд авч хэрэгжүүлж буй болон хэрэгжүүлэхээр төлөвлөж буй ажлын талаар тайлан, мэдээлэл ирүүлэх.
Асуулгын хариуг Монгол Улсын Их Хурлын тухай хуульд заасан хугацаанд бичгээр ирүүлж, улмаар Улсын Их Хурлын чуулганы нэгдсэн хуралдаанд сонсгохыг Танаас хүсье” гэжээ.