Голландын нийслэл Амстердам хотноо өнгөрөгч амралтын өдөр болсон жүдо бөхийн гран-при тэмцээнд Монголын тамирчид амжилттай оролцлоо. Дэлхийн 63 орны 400 гаруй жүдоч зодоглосон тус тэмцээнд Монголын баг тамирчид эрэгтэй ес, эмэгтэй таван тамирчны бүрэлдэхүүнтэй оролцож, хоёр алт, нэг мөнгө, гурван хүрэл медаль хүртэж, хоёр тамирчин шагналт тавдугаар байрт шалгарсан амжилтаар багийн дүнгээр хоёрдугаар байрт бичигдлээ. Тэмцээний эхний өдөр буюу бямба гаригт Монголын тамирчдаас эрэгтэйчүүдийн 60 кг-д ОУХМ, ШШГЕГ-ын харьяа, "Сүлд" спорт хорооны тамирчин Д.Төмөрхүлэг алт, ОУХМ Ч.Болдбаатар хүрэл, 66 кг-д ОУХМ С.Мияарагчаа мөнгө, ШШГЕГ-ын харьяа, "Сүлд" спорт хороо, "Оюутолгой" компанийн элч тамирчин, Хөдөлмөрийн баатар, Гавьяат тамирчин Х.Цагаанбаатар хүрэл, эмэгтэйчүүдийн 63 кг-ын жинд ОУХМ Ц.Мөнхзаяа хүрэл медаль хүртсэн бол өчигдөр эмэгтэйчүүдийн -78 кг-д ОУХМ П.Лхамдэгд түрүүлж, аваргын алтан медалийг ихэрлүүллээ.П.Лхамдэгдийн жинд 15 бөх барилдсан бөгөөд манай бөх эхний тойрогт Камеруны бөх Ванесса Мбаллаг цэвэр, улмаар Словенийн Анамари Веленсекийг мөн цэвэр ялж, медалийн болзол хангажээ. Улмаар хагас шигшээд залуучуудын дэлхийн аварга, Европын аваргын хүрэл медальт, Германы бөх Луисе Малзаныг юүкогоор дийлж, аваргын төлөө мөн Германы тамирчин Хайде Уоллертийг цэвэр ялсан байна. Тэрбээр ийнхүү аваргын алтан медалиас гадна чансааны 200 оноо авснаар 938 оноотой болж, чансааны долдугаар байр хүртэл дэвших боломжтой болж байгаа юм.
Мөн өчигдөр Амстердамын татамид хүч үзсэн Бээжингийн олимпийн аварга, Монгол Улсын Хөдөлмөрийн баатар, Гавьяат тамирчин Н.Түвшинбаяр медалийн төлөөх барилдаанд 2009 оны дэлхийн аварга, Казахстаны бөх Максик Раковт нэмэлт цагт цэвэр ялагдсанаар тавдугаар байрт шалгарав. Мөн энэ жинд барилдсан ОУХМ Б.Тэмүүлэн эхний тойрогт Румыны бөхөд цэвэр ялагдсанаар тэмцээнээ дуусгалаа. Түүнчлэн эрэгтэйчүүдийн +100 кг-д Х.Мөнхбаатар эхний тойрогт дэлхийн чансааны 22-т эрэмбэтэй, дэлхийн гурван удаагийн аварга, ОХУ-ын жүдоч Александр Михаилинтай барилдаж, дийлдсэн бол эмэгтэйчүүдийн 70 кг-д ОУХМ Ц.Наранжаргал эхний тойрогт Францын Мари Паскег ялсан ч удаахь барилдаандаа Украйны бөх Наталия Смальд ялагдсан байна.
