-Манай улсын дипломат ажилтан Польш улсад баригдсан гэсэн мэдээлэл байгаа. Энэ талаар дэлгэрэнгүй мэдээлэл өгөөч?
-Монгол Улсын ОХУ дахь Элчин сайдын яамны хоёрдугаар нарийн бичгийн дарга А.Батсайхан ээлжийн амралтаараа Польш улсад явж байхдаа тус улсын цагдаагийн газарт саатуулагдсан. Москва дахь ЭСЯ-ы ажилтан А.Батсайханыг Польшийн Прокурорын байгууллагын шийдвэрээр гурван сарын хугацаатайгаар саатуулсан байгаа. Манай улсын Москва дахь элчин сайдын яамнаас Польш улсын Хилийн цэргийн алба, Люблин дэх прокурорын газар уулзалт хийсэн байсан. Уулзалтаар хэргийг ойрын үед шүүхэд шилжүүлэн ажиллахаа прокурорын газраас мэдэгдсэн аж. Мөн Польшийн тал манай ЭСЯ-ны консулын хэлтэст ноот бичиг ирүүлсэн байсан. Энэ ноот бичигт “Польшийн Эрүүгийн байцаан шийтгэх хуулийн 249 дугаар зүйлийн нэг болон 285 дугаар зүйлийн нэгийн 1,2-т заасныг тус тус үндэслэн Люблин дэх Баруун Люблин дүүргийн шүүх Авирмэдийн Батсайханыг гурван сарын хугацаагаар саатуулан хорих арга хэмжээ авав” гэсэн бичиг ирүүлсэн. Дипломат ажилтан А.Батсайханыг 2004-2007 онд Монгол Улсаас БНПУ-д суугаа ЭСЯ-нд ажиллаж байхдаа янжуур тамхи хууль бусаар хил дамжуулан зөөвөрлөсөн гэсэн хэрэгт сэжиглэн шалгаж байгаа юм байна. Энэ хэрэгт зөвхөн сэжигтнээр татан шалгаж байгаа.
-Тэгэхээр А.Батсайхан нь сая Польш улсад амарч байхдаа хууль бус тамхи зөөвөрлөөгүй гэсэн үг үү?
-Тийм ээ. Зөвхөн 2004-2007 онд ажиллаж байхдаа хууль бусаар хар тамхи зөөвөрлөж байсан байж болзошгүй гэсэн үндэслэлээр шалгаж байгаа. Тухайн үед манай улсын хэд хэдэн иргэн хууль бус тамхи зөөвөрлөсөн гэж саатуулагдан шалгагдаж байсан юм. Манай улсын 10 гаруй иргэн Польш улсад хууль бус тамхины хэргээр шалгагдаж, саатуулагдаж байсан. А.Батсайханыг ч гэсэн тухайн үеийн хэрэгт холбоотой байж болзошгүй гэсэн үндэслэлээр шалгаж байгаа гэсэн тайлбарыг бидэнд болон Москва дахь Элчин сайдын яамныханд мэдэгдсэн. Хамгийн сүүлийн мэдээллээр Прокурорын байгууллага шалгаж дуусаад шүүхэд шилжүүлнэ байх гэсэн.
-А.Батсайхан нь энд байхдаа ямар албан тушаал эрхэлж байсан юм бэ?
-Гадаад харилцааны яамны Бодлого төлөвлөлтийн газар ажиллаж байгаад Төрийн ёслолын албанд орсон байгаа юм. 2003-2007 онд Монгол Улсаас Польшид суух Элчин сайдын яаманд түр хамаарагчаар ажиллаж байгаад Москвагийн ЭСЯ-ны хоёрдугаар нарийн бичгийн даргаар томилогдон ажиллаж байсан. Олон жил ажиллаж байгаа ажилтан байгаа юм.
-Мөн урд хөршид хоёр монгол оюутан хар тамхины хэргээр саатуулагдсан гэсэн?
-БНХАУ-д Монгол Улсын хоёр оюутан хар тамхи зөөвөрлөж яваад баригдсан талаар тус улсаас манайд мэдэгдсэн. Оюутнууд 500 граммаас дээш хэмжээний хар тамхи буюу мансууруулах бодис зөөвөрлөж яваад баригдсан байна. Энэ хоёр оюутныг саатуулан хэрэг үүсгэн шалгаж байгаа талаар БНХАУ-аас албан ёсоор мэдээлсэн. Энэ хэргийг шалгаж байгаа учраас дэлгэрэнгүй мэдээлэл өгөх боложгүй байна. Тэгээд ч тухайн улсаас бидэнд олон нийтэд мэдээлэхгүй байхыг хүссэн юм. Одоогоор оюутнуудын талаар ч гэсэн дэлгэрэнгүй мэдээлэл өгөх боломжгүй.
-БНХАУ-д хэр хэмжээний бодис биедээ авч явбал цаазын ял оноодог юм бол?
-БНХАУ-д 50 граммаас дээш хэмжээний алт зөөвөрлөсөн, биедээ авч явсан тохиолдолд цаазаар авах ял оноодог юм байна лээ. Манай улсын хоёр оюутан хар тамхи зөөвөрлөж явсан эсвэл зарж борлуулах гэж байсан эсэхийг шалгаж тогтоох ажиллагаа үргэлжилж байгаа.
-Урд хөршид манай улсын хэдэн иргэн хар тамхи болон мансууруулах бодисын хэрэгт холбогдоод байна вэ?
-БНХАУ-д хар тамхи, мансууруулах бодисны хэрэгт манай улсын 10 гаруй иргэн холбогдсон байгаа юм байна.