Монгол улсад Хүүхдийн байгууллага үүсч хөгжсөний 85 жилийн ойг угтан Нийслэлийн ЕБС-н 9-11-р ангийн сурагчдын дунд уралдаант цэнгээнт, танин мэдэхүйн “ДЭВЖЭЭ” наадмыг шинэлэг, өвөрмөц хэлбэрээр явуулж эхлээд багагүй хугацаа өнгөрч байна. Наадмын ерөнхий зохион байгуулагчаар Монголын Үндэсний Боловсрол Суваг телевиз, Нийслэлийн Хүүхдийн Төлөө Газар,  ерөнхий ивээн тэтгэгчээр Скайтел компанийн D20 брэнд, дэмжигч байгууллагаар Raffles International Institute ажилласан юм.    

Зохион байгуулагчид “Боловсролтой өсвөр үе-Монголын ирээдүй” гэсэн уриатайгаар энэхүү наадмыг зохион байгуулсан нь сурагчдын нийгмийн идэвхи оролцоог нэмэгдүүлсэн, тэдний боловсрол мэдлэгийн түвшинг дээшлүүлэх маш чухал тэмцээн болсон нь хүүхдүүдийн идэвхи оролцооноос шууд харагдаж байна.
   

 Дэвжээ наадамд нийслэлийн ерөнхий боловсролын 100 гаруй сургуулиас 45 сургууль оролцож ухаан бодол авъяас чадвараараа өрсөлдөн эхний шатнаас шилдэгийн шилдэг 15 баг шалгарч үлдэн хагас финалд өрсөлдөх эрхээ олж авсан. Хагас финалд үлдсэн сургуулиудаас гадна үзэгчдээс хамгийн их мессеж санал авсан 3 сургуулийг шууд хагас финалд оролцох эрхээр шагнасан юм. 2010 оны 4-р сарын 16,17,18-ны өдрүүдэд наадмын хагас финалын тоглолтууд маш ширүүн өрсөлдөөн дунд болж өдөрлөлөө. Эцсийн шатанд  84-р сургуулийн “Монгол Сэтгэмж” баг, Сэтгэмж Цогцолбор сургуулийн “Гүмүда” баг, 44-р сургуулийн “Хязгааргүй Тэмүүлэл” баг, Шавь Цогцолбор сургуулийн “Жавхаа” баг, 35-р сургуулийн “Залгамж” баг, Цэцээ Гүн Цогцолбор сургуулийн “Талын Язгууртан” баг, 53-р сургуулийн “Ирээдүйн Хөтөч” багууд шалгаран үлдэж 10,000,000 төгрөгийн төлөө өрсөлдөх эрхээ олж авлаа байна.
Сурагчид энэ наадамд оролцсоноор тэдний хамт олны төлөвшил, багаар хамтарч ажиллах, хууль эрх зүйн мэдлэг, авъяас чадвар нь дээшлэхээс гадна өсвөр үеийнхний дундах гоц авъяастнууд олны анхааралд өртөж, цаашилбал улам хөгжих гол талбар нь ДЭВЖЭЭ байх юм байна.