Олон улсын олимпийн хорооноос санаачлан өсвөрийн зуны анхдугаар олимпийн наадмыг өнгөрсөн жил Сингапурт зохион байгуулсан билээ. Тэгвэл өсвөрийн анхдугаар өвлийн олимп ирэх жил Австрийн Инсбрук хотноо болох гэж байна. Өмнө нь 1964 болон 1976 оны цагаан олимпийг, дараа нь 1984, 1988 онд өвлийн паралимпийг зохион байгуулж байсан Инсбрук хотоос монголчуудын олимпийн түүх эхтэй. 1964 оны өвлийн IX олимпийн наадам нэгдүгээр сарын 29-нөөс хоёрдугаар сарын 9-нд болсон бөгөөд Монголын баг тамирчид цана, тэшүүр болон биатлоны төрөлд хүч сорьж байсан юм. Харин тухайн жилийнхээ зун болсон Токиогийн олимпод оролцсон нь Монголын спортын түүхэн дэх анхны зуны олимпийн наадам байлаа.
 
Тэгвэл, монголчуудын олимпийн жимийг эхлүүлсэн Инсбрук хотноо болох өсвөрийн анхдугаар өвлийн олимпод Монголын цаначин оролцох болжээ. Монголын өсвөрийн хоёр цаначин өнгөрсөн хавар Инсбрукийн олимпийн эрх олгох тэмцээнд оролцсон ч эрхийн болзол хангаж чадаагүй юм. Улмаар Монголын үндэсний олимпийн хорооноос ОУОХ-нд хүсэлт тавьсны дагуу Монголын багт гүйлтийн цанын төрөлд нэг эрэгтэй тамирчнаа оролцуулах эрх олгожээ. Ингэснээр эрх олгох тэмцээнд оролцсон хоёр тамирчны нэгийг сонгон Инсбрукийн цагаан олимпод илгээх боломжтой болж байгаа юм. Энэ тухай Олон улсын цанын холбооны мэргэжилтэн Аннамэри Фредрих МҮОХ-ны Ерөнхий нарийн бичгийн дарга Ж.Отгонцагаанд и-мейл илгээж, дээрх таатай мэдээллийг дуулгажээ.