Монгол Улсын Ерөнхийлөгч Цахиагийн Элбэгдорж БНХАУ-ын дарга Ху Жинтаогийн урилгаар  дөрөвдүгээр сарын 28-наас тавдугаар сарын 3-ны өдрүүдэд БНХАУ-д Төрийн айлчлал хийх гэж байгаа юм. Уг айлчлалын бүрэлдэхүүнд Монголын талаас УИХ-ын дэд дарга, Монгол Хятадын парламентын бүлгийн дарга Г.Батхүү, Гадаад харилцааны яамны сайд Г.Занданшатар, БСШУЯ-ны сайд Ё.Отгонбаяр болон УИХ-ын хэд хэдэн гишүүд, гол гол яамдын төлөөлөгчид багтаж байна.
Монгол Улсын Ерөнхийлөгч энэ сарын 28-ны өдөр БНХАУ-ын Төрийн Зөвлөлийн Ерөнхий сайд Вэнь Зябаотай Бээжин хотод уулзах бөгөөд Төрийн айлчлалын гол угтах ёслол нь ирэх тавдугаар сарын 1-ний өдөр Шанхай хотод болох ажээ.

Ерөнхийлөгч айлчлалынхаа үеэр Шанхай хотноо зохиогдох олон улсын экспогийн нээлтэд оролцох бөгөөд БНХАУ-ын зүүн хойд хэсэгт орших Жилинь муж улс, ӨМӨЗО-нд зочилох юм байна. Тус айлчлалын үеэр ӨМӨЗО-ны нийслэл Хөх хотод Монголын соёлын өдрүүд зохиогдох бөгөөд Бээжин хотод Монгол Хятадын бизнесийн форум болно. Ерөнхийлөгчийг дагалдан явах бизнес эрхлэгчдийн бүрэлдэхүүнд Монголын 40 гаруй компанийн төлөөлөгчид багтаад байна.

Г.Дарь