Грекийн Засгийн газрын шинэ тэргүүнээр Европын банкны дэд ерөнхийлөгч асан Лукас Пападемосыг томилжээ. Тус улсын парламентын гурван том намын лидерүүд үндэсний эв нэгдлийн засгийн газар байгуулахаар Ерөнхийлөгчтэй хэдэн өдрийн турш хэлэлцэж, дээрх шийдвэрт хүрсэн байна. Грекчүүд шинэ засгийн газар өрөнд баригдсан тус улсыг хямралаас гаргаж, эдийн засгийн тогтвортой байдлыг бий болгоно гэж найдаж байгаа юм. Шинэ Ерөнхий сайд Лукас Папедемос ирэх хоёрдугаар сарын парламентын бүх нийтийн сонгууль хүртэл Грекийн Засгийн газрыг тэргүүлэх юм.

Грекийн шинэ засгийн газрын нэн тэргүүнд шийдвэрлэх  асуудал нь ОУВС болон Европын холбооны түншүүдээс 130 тэрбум еврогийн санхүүгийн зээл авч өрийн дарамтаас гарах юм. Шинээр байгуулагдсан засгийн газар өнөөдөр тангараг өргөнө гэж Грекийн Ерөнхийлөгчийн албанаас мэдэгдсэн байна.

Герман, Франц зээл олгож Евро бүсийн эдийн засгийг доройтуулах гэж байна гэдэг шүүмжлэлийг Канцлер Ангела Меркел эсэргүүцэж, өрийн хямралд орсон орнуудад зээл олгосноор бүсийн тогтвортой байдлыг хангаж, еврогийн өрсөлдөх чадварыг нэмэгдүүлэх зорилготой гэж мэдэгджээ.

Евро бүсийн эдийн засгийн өсөлт 1.8- 0.5 хувь хүртэл буурсанд Европын холбоог буруутгаж байгаа бөгөөд дэлхийн эдийн засагт дахин хямрал ёрлож байна гэж үэзж байгаа юм. Грекийн өрийн хямрал намжиж амжаагүй байхад Итали Евро бүсийн толгойн өвчин болоод байгаа ажээ. Европын банкны дэд ерөнхийлөгч асан Лукас Пападемос Грекийн Ерөнхий сайдаар томилогдсоны дараа "Энэ үүрэг амаргүй гэдгийг би ойлгож байна. Гэвч бид нэгдэж, зөвшилцөж чадвал хямралаас гарч чадна гэдэгт итгэлтэй байна” гэжээ.