Төрийн албан
хаагчдын цалинг ирэх оны гуравдугаар сарын 1-нээс эхлэн үе шаттайгаар
нэмэгдүүлэхээр болж, УИХ-ын төвшинд 2012 оны төсвийн хүрээнд
хэлэлцэж буй. Гэвч багш нарын хувьд цалинг гуравдугаар сарын 1-нээс эхлэн нэмэгдүүлэхийг эсэргүүцэж, оны
эхнээс нэмэх ёстой гэсэн шаардлага тавин, соёл урлагийн байгууллагынхныг ч
тэмцэлдээ нэгтгээд байгаа. Зорилгодоо хүрэхийн тулд шаардлага
ч өргөн мэдүүлээд буй. Шаардлагын хариуг өгөх эцсийн
хугацаа өнөөдөр бөгөөд Боловсрол, соёл, шинжлэх ухааны сайд Ё.Отгонбаяраас багш нарын шаардлагад ямар хариу өгөх болсон
талаар тодруулахад “Надад хамааралгүй асуудал. Шаардлага
нь ч миний гарт ирээгүй” гэх тайлбар хийлээ.

Засгийн газраас өргөн мэдүүлсэн төслөөр бол төрийн албан хаагчдын
цалинг 53 хувиар нэмэгдүүлэхэд багш, эмч нарын дундаж цалин 600 мянган төгрөгт хүрч, 2008 оны
төвшнөөс хоёр дахин нэмэгдэх боломжтой болж буй юм. Харамсалтай нь, энэхүү нэмэгдэлд
багш нарын сэтгэл ханахгүйгээр барахгүй “Цалин бага болохоор сурагч нараасаа юм авахаас яах юм” хэмээн мэдэгдээд буй.

Г.Дарь