УИХ-ын Төрийн байгуулалтын байнгын хорооны хуралдаанаар Сонгуулийн тухай хуулийн эцсийн хэлэлцүүлгийг хийлээ. Гэхдээ энэ удаа тойргийн хуваарилалт, тогтолцоо зэргээс тойрч торгууль тойрсон сэдвээр дагнан ярилцав. Сонгуулийг будилуулсан, нэр дэвшигчдийн нэр төрийг гутаасан, нэр дэвшигч өөрөө хууль зөрчсөн, авлига, хээл хахуулийн сэдэлтэй зүйл хийсэн, санал хураалтад нөлөөлсөн, ажилдаа хариуцлагагүй хандсан зэрэг хувь хүн, албан тушаалтан, хуулийн этгээдэд мөнгөн торгууль ногдуулах талаар хэлэлцсэн юм. Гишүүн Д.Одхүү Монгол Улсын иргэний сонгох, сонгогдох эрхийг хохироосон төрийн албан хаагчийг сарын цалингийн доод хэмжээг арав дахин нэмэгдүүлсэн хэмжээгээр торгоно гэснийг Су. Батболд гишүүн эсэргүүцэж, “Гишүүд сүүлийн үед Эрүүгийн хуульд зааснаас давсан хэмжээний торгууль ногдуулах асуудлыг хуульд оруулах гэдэг болсон байна. Сонгуулийн ажилтны цалин сайндаа 300 мянган төгрөг. Сонгуулийг будилуулдаг нь улстөрчид. Улстөрчдөөс болж 300 мянган төгрөгийн цалинтай хүнийг ингэж өндөр торгож таарахгүй. Сүүлийн үеийн хуулиудад төрийн албан хаагчдыг санаанд оромгүй өндөр хувиар торгох асуудал явдаг болсон” гэлээ.

Ингээд гишүүд Сонгуулийн хууль зөрчиж сонгууль будилуулсан хүн, хуулийн этгээдийг торгох хувь хэмжээг ярилцсан юм. Тухайлбал, буруутай албан тушаалтныг сарын цалингийн доод хэмжээг 2-3 дахин, Сонгуулийн хорооны даргыг мөн хэмжээгээр, Сонгуулийн хорооны гишүүн болон иргэнийг 1-2 дахин, хуулийн этгээдийг 3-7 дахин нэмэгдүүлсэн хэмжээгээр торгох талаар хуулийн төсөлд оруулахаар болов. Мөн буруутай нэр дэвшигчийг нэг сарын хөдөлмөрийн хөлсний доод хэмжээг 3-5 дахин нэмэгдүүлсэн хэмжээгээр торгоно гэв. Тэгсэн атлаа худал мэдээлэл цацсан хэвлэл, мэдээллийн хэрэгсэлд нэг сарын хөдөлмөрийн хөлсний доод хэмжээг 35-70 дахин нэмэгдүүлсэнтэй тэнцэх хэмжээний торгууль хүлээлгэхээр төсөлд оруулав. Ингэхдээ 10 хувийг их гэж маргалдаж байсан гишүүд дуугарсангүй. Ингээд ирэх сонгуулийн үер хэвлэл, мэдээллийн хэрэгсэл худал мэдээлэл цацсан гэх хэрэгт унавал дааж давшгүй торгууль үүрэхээр боллоо.

Гишүүн Д.Одхүү нэр дэвшигчийн буруутай эсэхийг баримтаар нотлохгүй бол өрсөлдөгч нь хорлон сүйтгэх ажил явуулж болзошгүйг анхааруулсан юм. Харин СЕХ-ны дарга Н.Лувсанжав сонгуулийн процесс дунд зөрчлийг шалгахад хэцүү байдгийг хэлж байлаа. Олон улсын практикаар бол Сонгуулийн байгууллага хагас шүүх, хагас мөрдөн шалгах эрхтэй байдаг аж. Монголд ч тийм болох хэрэгтэй гэж зарим гишүүн хэлж байсан юм.

Санал хураалтад биеэр оролцож чадахгүй хэвтрийн өвчтэй, цагдан хоригдсон, урьдчилан хориход саатуулагдсан зэрэг хүнээс зөөврийн хайрцгаар санал авахад хяналт сайн байх ёстойг гишүүд хэлж байлаа. “Ялангуяа хэвтрийн хүн бол удаан хугацааны өмнөөс хэвтэрт орсон байдаг. Түүнийг эрүүл мэндийн байгууллагаар тогтоолгох хэрэгтэй” гэж З.Энхболд гишүүн хэлж байлаа.  Мөн сонгуулиар мөнгө амлахаас татгалзахаар гишүүд санал нэгдэв. Ингээд урт настай Сонгуулийн хуулийн төслийг чуулганы нэгдсэн хуралдаанд оруулахаар болов. Сонгуулийн автоматжуулсан системийн тухай хуулийн төслөөр гишүүд асуулт, санал гаргасангүй. Мөн л чуулганы нэгдсэн хуралдаанд оруулахыг дэмжлээ.