Зураачид өргөсөндөө алим хатгаад авч явж байгаа зарааг зөндөө л зурсан байдаг. Хэрэв зараа өвлийг ичээндээ унтаж өнгөрөөдөг юм чинь түүнд алим яагаад хэрэгтэй юм бол гэсэн энгийн асуултанд олон хүн тодорхой хариулж чадахгүй байх. Бас зуны цагаар энэ амьтан ургамалын гаралтай хоол маш бага хэмжээгээр хэрэглэдэг гээд бод доо.
Зарааны гол хоол нь хорхой шавьж, могой, гүрвүүл юм. Харин тэр алим жимсийг ариун цэвэртээ хэрэглэдэг гэнэ. Өргөсөөрөө өвс ногоо, бут сөөгийг тээглүүлэн ойгоор гүйж байхдаа тэр асар их тооны шимэгчдийг биеэндээ цуглуулан авдаг аж. Шимэгчид биеийг нь хазаж ихээхэн загтнуулдаг. Тэгээд л тэр алимыг өргөсөндөө хатган авч явах ба алимны эсгэлүүн шүүс түүнийг шимэгчдээс ангижруулдаг ажээ.