“Лондон-2012” зуны XXX олимпийн наадмыг зохион байгуулах хорооноос олимпийн галт бамбарын аяллын хөтөлбөрийг баталжээ. Хөтөлбөрийн дагуу бамбарын аялал 2012 оны тавдугаар сарын 19-нд эхэлж, долдугаар сарын 27 хүртэл Их Британи даяар 1018 газраар аялах юм байна. Аяллын хөтөлбөрт Giant’s Causeway, Stonehenge зэрэг Британийн алдартай бүхий л газрууд багтжээ. Нийт 70 өдөр үргэлжлэх аяллын хамгийн сүүлийн өдөр галт бамбарыг Темза голоос Олимпийн тосгонд авчрах аж. Олимпийн галт бамбарын аялалд нийт 8000 хүн оролцож, бамбарыг аялуулах гэнэ. Түүнчлэн олимпийн ариун галыг явганаар аялуулахаас гадна завь, унадаг дугуй, трамвай, галт тэрэг гээд тээврийн бүхий л төрлийн хэрэгслээр зорчуулах юм байна.

Аялал нийт 8000 миль буюу 12 мянга гаруй км үргэлжилнэ. Уламжлал ёсоор галт бамбарыг Грекийн олимп хотноо 2012 оны тавдугаар сард бадамлуулж, тавдугаар сарын 18-нд Британид авчрах юм. Улмаар бамбарын аялал 19-ний өглөө эхлэх аж.