Төв аймгийн Батсүмбэр сумын цэцэрлэг нь 1954 онд анх 25 хүүхэд, гурван ажилтантайгаар ажиллаж эхэлсэн бөгөөд 1986 онд өргөжиж, 100 хүүхдийн ортой 14 ажилтантай үйл ажиллагаагаа явуулж иржээ. 2005 оноос гурван бүлэг, 2007 онд багийн 25 хүүхдийн хоёр бүлэг шинээр нээгдэн үйл ажиллагаагаа явуулж одоогоор таван бүлэг 21 ажилтантайгаар үйл ажиллагаагаа явуулж байна.

Төв аймгийн Батсүмбэр сум нийт 1925 өрхийн 6736  хүн амтай. Эдгээр 1925 өрхийн хүүхдүүдэд сургуулийн өмнөх боловсрол олгохоор Төвийн цэцэрлэг, Баянголын цэцэрлэг, Сөгнөгөрийн цэцэрлэг, Үдлэгийн цэцэрлэг, ТЗ-ын цэцэрлэг гэсэн нийт  таван цэцэрлэг үйл ажиллагаа явуулж байна. Өнгөрсөн  баасан гаригт сумын төвийн цэцэрлэг жил бүр уламжлал болгон зохион явуулдаг “Алтан намар“ өдөрлөгийг зохион байгуулжээ. Энэхүү өдөрлөг нь эцэг эхчүүд хүүхдүүдээ хэрхэн амт чанартай, тэжээллэг илчлэг сайтай хоол хүнсээр  хооллох, хоол бэлтгэх туршлага солилцох цэцэрлэгийн үйл ажиллагаанд эцэг эхчүүдийг татан оролцуулах зорилготой зохион байгуулагддаг  уламжлалт өдөрлөг юм.