ХХААХҮЯ-аас “Хүнсний аюул­гүй байдлыг хангахад худалдааны байгууллагад тулгамдаж байгаа асуу­дал” сэдвээр хэлэлцүүлэг хийв.  Хэлэлцүүлгийн гол агуулга нь иргэдийн эрүүл мэндэд яг ямар төрлийн бүтээгдэхүүн сөргөөр нөлөөлдөг талаар хэлэлцсэн билээ. Монгол Улсын хэмжээнд хүнсний аюулгүй байдал алдагдсан гэдэгтэй олон хүн санал нийлэх нь гарцаагүй. Тэр тусмаа хоол хүнсний материалыг  БНХАУ-аас импортолж байгаа нь үндэсний аюулгүй байдалтай шууд холбоотой. Гэвч оруулж ирж байгаа хүнсний бүтээгдэхүүний чанарын асуудал бус, тээвэрлэлтийн явцад ямар нэ­гэн байдлаар задаргаа орсон, сал­хи нэвтэрсэн гэх шалтгаанаар муу­даж өмхийрдөг. Тэр ч бүү хэл хүнсний за­рим бүтээгдэхүүний үйлд­вэр­лэсэн он, сар дууссан байхад нь манайхан өөрсдөө хямдруулаад лан­гуун  дээрээ тавьчихдаг “хөгийн” зан­тай. Юм бүхнийг бусад руу чихэх биш, өөрсдийн буруутай үйлдлийг эргэцүүлэн бодох чадваргүй гэсэн үг. Өнөөдөр манай улсад хүнсний стандартыг на­рийвчлан тогтоохын тулд ши­нэ лаборатори буюу сорилтын лабо­ратори, шинжилгээний лаборатори, химийн тоон шинжилгээ хийх лабо­ратори зэрэг хэрэгтэй байгаа аж. Уг нь энэ оны тавдугаар сарын 5-ны өдөр Монголын хүнсний худалдааны зах, төвүүдийн холбоо байгуулагдсан. Энэхүү төрийн бус бай­гууллага нь өмчийн хэлбэрийг үл харгалзан сум, дүүрэг, аймаг нийс­лэлийн хүнсний худалдааны зах, төвүүдийн үйл ажиллагааг зохи­цуулахад чиглэсэн байдаг. Тэр утгаараа хүнсний аюулгүй байдлыг хангаж ажиллахад хамгийн чухал байгууллагын нэг баймаар. Гэвч сүүлийн үед нам жим байгаад зарим иргэн, хувь хүмүүс ам муутай байгаа гэсэн. Мөн худалдааны салбарт хэрэгжүүлж байгаа төрийн хяналтыг сайжруулах хэрэгтэй байгааг  хэлэлцүүлэгт он­цол­сон. Тэр ч  бүү хэл “Хүнсний аюул­гүй байдал сайжрах боломжтой ч бид хариуцлагагүй ханддаг” хэмээн шүүмжлэх хүн их олон байв. ХХААХҮЯ-аас хийсэн хэлэлцүүл­гээр хамгийн их чухалчилж байсан зүйл бол мах, махан бүтээгдэхүүн болон хуурай сүү, сав баглаа, үйлд­вэрлэлт, техникийн зохицуулалт юм.

Мах. Энэхүү хүнсний бүтээг­дэ­хүүнд тулгарч буй асуудал бол хөрсний бохирдлоос эхлээд хадгалах, өөрөөр хэлбэл тээврийн явцад хөргөөх автомашин. Мал сүрэг бэлчээрээс шим тэжээлээ авдаг. Харин монголчууд хэдэн уурхайн хөрсний бо­хирд­лоос болж эрүүл бус малын мах хүнсэндээ хэрэглээд удаж байна. Гаднаас оруулж ирж байгаа гэх мах, махан бүтээгдэхүүний үйлд­вэр­лэсэн хугацаа асуудал дагуулдаг тохиолдол ч бий. Улмаар махны хадгалалт, тээвэрлэлтийн асуудал хамгийн чухал. Үйлдвэрийн хөл­дөөгчнөөс дэлгүүрийн ямар нэг сал­бар руу хүргэх явцад замдаа шүүс нь гоожих, бохирдох зэрэг олон зүйл тохиолддог. Одоохондоо мах тээвэрлэх зориулалтын машин орж ирээгүй байгаа аж.

Хуурай Сүү.  Монгол Улсын хэм­жээнд экологийн буюу малын гаралтай сүүг иргэдийн хэрэгцээнд хүргэж байгаа компаниуд тун цөөн.  Арав гаруй сүүний ком­пани бай­лаа гэж бодоход тал хувь нь гад­наас хуу­рай сүү оруулж ирээд яг ижил савла­гаатай шингэн сүү бол­гон бор­луул­даг. За­римдаа хуурай сүүний илчлэг ча­нар алдагдах тохиол­дол ч гардаг аж. 

Сав, баглаа. Хүнсний бүтээгдэхүүний сав, баглаа хийдэг компаниуд ихэвчлэн хуванцар сав л хийж байгаа. Харин дэлхий нийт шилэн сав, баглаа руу хурдацтай шилжиж байгаа. Хуванцар савны үйлд­вэрлэлтийг нарийн хөгжүүлж амжаагүй байхад бусад улс өөр систем рүү шилжих болов.

Техникийн зохицуулалт. Хүнс­ний бүтээгдэхүүн бол үйлдвэрээс гараад шууд л иргэдийн гар дээр ирэх ёстой байдаг. Харамсалтай нь тээвэрлэлтийн гажуудлаас болж цаг хугацаанд нь хэрэглэх боломж­гүй болдог хэд, хэдэн шалт­гаан байдаг. Жишээ нь нэг үйлд­вэр түгээлтийн таван ма­шинтай. Харин тухайн мөчид зэрэг 20 га­зар түгээхгүй бол хүнсний бү­тээг­дэхүүний аюулгүй байдал алдаг­даж, муудах хугацаа ойртдог аж. Мөн зориулалтын тээврийн хэрэгсэл ашиглах нь бүтээгдэхүүний чанарыг удаан хадгалдаг тул хүнсний аюул­гүй байдлын тал дээр асуудал үүсээд байдаггүй.