Олон улсын хөлбөмбөгийн холбоо /FIFA/ болон Францын “France Football” сэтгүүл 2011 оны хөлбөмбөгийн шилдэг 10 дасгалжуулагчийн нэрийг зарлалаа. Эдгээр 10 тактикийн мэргэжилтнүүдээс 2011 оны дэлхийн шилдэг дасгалжуулагч тодрох учиртай. Ялагч 2012 оны нэгдүгээр сарын есөнд “Алтан бөмбөг”-ийн эзний хамт Швейцарийн Цюрих хотноо шалгаруулна. Оны шилдэг дасгалжуулагчийг 1982 оноос хойш 29 дэх жилдээ шалгаруулж байна. 

Эдгээр 10 нэр дэвшигчдээс “Барселона” багийн дасгалжуулагч Пеп Гвардиола болон “МанЮ”-гийн менежер Сир Алекс Фергюсон нарын аль нэг шилдэг болох магадлал өндөр байгаа юм. Сир Алекс Фергюсон энэхүү хүндтэй цолыг дөрвөн удаа /1993, 1999, 2007, 2008/ хүртсэн бол Гвардиола 2009 онд нэг удаа хүртэж байжээ.

Харин өнгөрсөн жилийн шилдэг дасгалжуулагч Жозе Моуриньо “Реал Мадрид” багтай Испанийн “Эзэн хааны цом”-оос өөр томоохон амжилт үзүүлээгүй юм. Мөн өнгөрсөн наймдугаар сард Испанийн “Супер цом”-ын тэмцээний үеэр эсрэг багийн туслах дасгалжуулагчийн нүд рүү санаатайгаар чичсэн зэрэг нь шилдэг болох магадлалыг бууруулсан гэж хөлбөмбөгийн зарим сэтгүүлчид үзэж байна.

Шилдэг дасгалжуулагчид нэр дэвшигчид:

1. Висенте дель Боске (Испани, Испанийн шигшээ)
2. Алекс Фергюсон (Шотланд, Манчестер Юнайтед)
3. Руди Гарсия (Франц, Лилль)
4. Хосеп Гвардиола (Испани, Барселона)
5. Юрген Клопп (Герман, Боруссия Дортмунд)
6. Йохим Лёв (Герман, АНУ-ын шигшээ)
7. Жозе Моуринью (Португал, Реал Мадрид)
8. Оскар Табарес (Уругвай, Уругвайн шигшээ)
9. Андре Виллаш-Боаш (Португал, Челси)
10. Арсен Венгер (Франц, Арсенал)