П.Н.Шастины нэрэмжит төв эмнэлгийн
мэдрэлийн мэс заслын эмч нар анх удаа тархины мэс заслыг тархины уян
дурангийн аргаар өчигдөр хийлээ. Тус эмнэлгийн мэдрэлийн мэс заслын
тасгийн хамт олон өнчин тархины хавдар авах нээлттэй мэс заслын
эмчилгээг 2007 оноос эхлэн хамрын хөндийгөөр микроскопийн тусламжтайгаар
хийж эхэлсэн юм. Харин өчигдөр Монгол Улсад анх удаа МУ-ын тэргүүлэх
зэргийн  эмч, клиникийн профессор Х.Хусаян ахлагчтай мэдрэлийн  мэс
заслын эмч нарын баг  ХБНГУ-ын “B Brain- Eusculap” фирмийн тархины уян
дурангийн тусламжтайгаар 74 настай Б гэдэг эмчлүүлэгчид өнчин тархины
хавдар авах мэс заслын эмчилгээг амжилттай хийлээ. Одоогоор өвчтөний
биеийн байдал сайн байна. Уг хагалгаа нь өнчин тархины хавдар авах
нээлттэй мэс заслын эмчилгээний аргаас олон давуу талтай юм. Уян
дурангийн аргаар хийж буй энэ хагалгаа нь эмчлүүлэгчид хагалгааны явцад
тархины эд эсэд гэмтэл багатай, хүндрэл багатай, гоо сайхны хувьд сорви
багатай, эмчлүүлэгч хагалгааны дараа 24 цагийн дотор өөртөө үйлчлэх
боломжтой сэргэлт хурдан зэрэг олон давуу талтай орчин үеийн шилдэг
аргуудын нэг юм.