Хууль зүй, дотоод хэргийн сайд Ц.Нямдорж өнгөрсөн амрал­тын өдрөөр MN25 дугаар телеви­зийн “168 цаг” мэдээллийн хөтөлбө­рөөр Н.Энхбаярын талаарх нэгэн ноцтой баримт үзэгч олонд дэлгэж, олон түмний чихийг сортойлгож, нүдийг нь оройд нь гарга­сан. Харин өчигдөр МАХН-ын гүйцэтгэх товчооны гишүүн Д.Батдэлгэр, Б.Батсайхан болон Чингэл­тэй дүүргийн мянгатын дарга тус намын гишүүн З.Баяссэлэнгэ нар хэвлэлийн бага хурал зарлаж Ц.Нямдорж сайдад хариу мэдэгдэл хийлээ. “Хууль зүй, дотоод хэргийн сайд Ц.Нямдорж долоо найман жил Хууль зүйн дээд байгууллагад ажиллаж байж, Н.Энхбаярын талаар авлига авсан, өгсөн гэх мэт зүйл ярих нь утгагүй хэрэг. Учир нь энэ олон жил тэрбээр үүнийг мэдэж байсан юм бол яагаад нуун дарагдуулсан юм гэдэг асуудал гарч ирж байгаа юм” хэмээсэн юм. Тэд Ц.Нямдорж сайдад хандан энэ бүхнийг сануулж, олон нийтийг худал хуурмаг зүйлд итгэхгүй байхыг ч сануулсан юм. Тэд дараах мэдэгдлийг гаргалаа.

Нэг. Н.Энхбаяр нь хуулийн дагуу төрийн тусгай хамгаа­лалтад байгаа. Энэ утгаараа төрийн өндөр албан тушаалтны халдашгүй эрхийг эдэлнэ. Ийм эрх бүхий хүнийг Цагдаагийн байгууллага дуртай цагтаа баривчлах, саатуулах оролдлого хийх нь байж болшгүй зүйл юм.

Хоёр. Н.Энхбаярыг  МАХН-аас Хууль зүй, дотоод хэргийн сайд Нямдор­жийн санаачилсан Цагдаагийн тухай хуульд нэмэлт өөрчлөлт оруулах ту­хай хуулийн төслийг эсэргүүцэж, хэвлэ­лийн бага хурал хийсний дараа­хан болсон энэ ажиллагаа хэний захиал­гаар хийснийг шууд заасан үйл явдал боллоо. Монгол Улсын ард түмний халдашгүй өмч болсон байгалийн баялгийг дур зоргоороо харийнханд худалдан урвагч олигархуудын “нохойд барьдаг мод” нь чухам хэн бэ гэдгийг энэ үйл явдал тодоос тод харуулж өглөө.

Гурав. Үйл явдлыг учир шалтгааны холбоогоор авч үзвэл Н.Энхбаярын тэргүүлсэн МАХН байгуулагдсан цагаасаа эхлэн Тавантолгойн ордыг ард түмний мэдэлд өгөх, Оюутолгойн хөрөнгө оруулалтын гэрээг хүчингүй болгох, авлигын сүлжээг таслах, ажилгүйдэл ядуурлыг бууруулах зэрэг асуудлыг тууштай тавьж ирсэн нь ард түмний дэмжлэгийг төрүүлсэн нь нэгэнт тодорхой болсон бөгөөд МАХН-ыг Улсын Дээд шүүхэд хуулийн дагуу бүртгэсэн үйл ажиллагааг улайран дайрч, шүүх засаглалын эрх мэдэлд эрээ цээргүй хутгалдахыг оролдож байгаа нь үүний жишээ мөн.

МАХН-ын зүгээс “Хууль зүй, дотоод хэргийн сайд Ц.Нямдоржийн уг үйлдэл нь ирэх хавар болох УИХ-ын сонгуулийн хугацаа ойртож бай­гаа энэ үед МАХН-ыг улс төрийн зорилгоор хэлмэгдүүлж, сонгуульд орох эрхийг нь хаах гэсэн зорилго гэдэг нь илэрхий” хэмээн үзэж буйгаа хэвлэлийн бага хурлаар мэдэгдсэн юм. Хэрэв Хууль зүй, дотоод хэргийн сайд Ц.Нямдоржийн хэлсэн бүхэн баримттай үнэн бол түүнийг шалгуулах хүсэлтэй байгаагаа ч МАХН-ын гишүүд онцолсон.  Ямартай ч Ц.Нямдорж сайд юу хийж байгаагаа сайн мэдэж байгаа болов уу.

Хууль зүй, дотоод хэргийн сайд Ц.Нямдорж­той  25-дугаар суваг телевизээр үзүүлсэн  нотлох баримтыг нь хуулбарлаж авах гэсэн боловч зөвшөөрөөгүй. Тэрбээр “За яах гэсэн юм бэ, хэрэггүй биз” хэмээн татгалзсан.