Хүүхдийн эрхийг хамгаалах “Plan International” байгууллагын мэдэгдсэнээр дэлхийн долоон тэрбум дахь иргэн Энэтхэгт төрсөн тухай ВВС мэдээлэв. Наргис нэртэй охин Энэтхэгийн Уттар Прадеш мужийн Молл тосгонд орон нутгийн цагаар 07.25 цагт төрсөн байна. Дэлхийн долоон тэрбум дахь иргэн хаана, хэдийд төрснийг яв цав мэдэх боломжгүй ч Наргис охиныг тэр азтай иргэн хэмээн “Plan International” үзэж байгаа юм.

НҮБ-аас аравдугаар сарын 31-нд буюу өнөөдөр дэлхийн долоон тэрбум дахь иргэн мэндэлнэ хэмээн мэдэгдсэн билээ. Улмаар өнөөдөр өглөө Филиппиний нийслэл Манилла хотод дэлхийн долоон тэрбум дахь иргэн төрсөн тухай мэдээллийн агентлагууд мэдээлсэн юм.

Энэтхэгт минут тутамд 51 хүүхэд төрдөг, харин хамгийн их хүн амтай Уттар Прадеш мужид нэг минутад 11 хүүхэд төрдөг байна. Наргис охины тухайд тус мужийн төв Лакхнау хотоос 50 км зайд орших Молл тосгоны жижиг эмнэлэгт төржээ.