Өмнөговь аймгийн Нарийнсухайт-Шивээхүрэн чиглэлийн авто зам барих, ашиглах, шилжүүлэх төрлийн онцгой эрх олгох концессын гэрээнд Төрийн өмчийн хорооны дарга Д.Сугар, “Ар Ди Си Си” компанийн гүйцэтгэх захирал Б.Чулуунзоригт нар гарын үсэг зурсан тухай “Нийгмийн толь” сонин өнөөдрийн дугаартаа мэдээлжээ. Хатуу хучилттай авто зам барих концессын гэрээ нь эл замыг барьж байгуулахад хоёр жил, ашиглаж үйл ажиллагаа явуулахад 15 жил, нийт 17 жилийн хугацаатай байх ажээ. Гэрээний хугацаа дуусахад авто замыг төрийн өмчид үнэ төлбөргүй шилжүүлэх ба энэ хугацаанд улсын төсвөөс ямар нэг санхүүгийн дэмжлэг, баталгаа гаргахгүй юм байна.

Энэхүү төслийн хэрэгжүүлэхэд концесс эзэмшигчээс нийт 98 тэрбум төгрөгийн хөрөнгө оруулалт хийж, ашиглалт, үйл ажиллагаанаас гарах эрсдлийг концесс бүрэн хариуцах гэнэ. Уг зам нь Өмнөговь аймгийн Нарийнсухайтын уурхайгаас Шивээхүрэн хилийн боомтын хооронд 47.5 км, хоёр урсгал, дөрвөн эгнээтэй жилд 40 сая тонн нүүрс тээвэрлэх хүчин чадалтай авто зам байх ажээ.

Төслийн авто замыг “МАК”, “Чинхуа МАК”, “Саусгоби сэндс” ХХК-уудын уурхайнууд нүүрс тээвэрлэлтийн үйл ажиллагаанд ашиглана. Энэхүү зам барилгын ажлын бүтээн байгуулалтад 200 барилгын өндөр мэргэжилтэн болон туслах ажилтан оролцох бөгөөд үүний 100 ажилтан нь орон нутгийн иргэд байх гэнэ.