Сирийн Ерөнхийлөгч Ба­шар Асад өрнөдийн ор­нуудыг заналхийлсэн ут­гатай зүйл ярьсан байна. Тэрбээр Sunday Telegraph сонинд өгсөн ярилцлагадаа барууны орнуудын удирдагч хэрэв дотоодын асуудалд хөндлөнгөөс оролцвол ха­туу тооцоо бодох тухай­гаа мэдэгджээ. Энэхүү сүр­дүүлгийг нь өрнөдийн орнууд төдийгүй олон улсын зүгээс эмзэглэн хүлээн авлаа. Башар Асад хэлэхдээ “Одоогийн байдлаар Ойрхи Дорнодын цөм нь манай улс болоод байна. Ийм учраас өрнөдийн түрэмгийлэгчид манай ул­сад болгоомжтой хандвал зохилтой. Эс тэгвээс Ойрхи Дорнодын аюулгүй байдалд сөргөөр нөлөөлөх болно. Манай улсын дотоод асуудалд хөндлөнгөөс хушуу дүрвэл бид хариуг нь чанга өгнө. Бид дайн дэгдээж, Ойрхи Дорнодын орнуудын голомтыг самрах болно. Бидний өшөө авалтад хүн төрөлхтөн хохирч, харамсаад барахгүй уй гашууд автах нь тодорхой. Иймээс манай улсын дотоод үйл хэрэгт оролцохгүй байхыг удаа дараа сануулж байна” гэв.

Сирийн Ерөнхийлөгч Ба­шар Асадын үзэж буйгаар тус улс нь стратегийн чухал байршил эзэлдгээс гадна улс төрийн онцгой тогтолцоотой тул гадаадын оролцоо байх ёсгүй хэмээжээ. Тэрбээр “Йемэн, Тунис, Египет, Ливи тэргүүтэй исламын орнуудад өнгөрсөн хавар бослого дэгдэж, улмаар эрх баригчдыг түлхэн унагаасан. Үүнийг өрнөдийн орнууд идэвхтэй дэмжсэний хар гайгаар ард иргэд санасандаа хүрсэн. Мөн манай улсад бослого хөдөлгөөн ширүүсч, иргэний дайнд хүрэхдээ тулаад байна. Гэвч манай улс засгийн тогтолцоогоороо бусдаас эрс он­­доо тул аливаа үймээн са­муун болох ёсгүй. Өөрөөр хэлбэл, бусад улсад бослого хөдөлгөөний дүнд төр засгаа эргүүлж чадсан бол манай улсад болохгүй. Учир нь Сирид бослого дэгдвэл улс үндэстнээрээ сүйрч, улмаар Ойрхи Дорнодын орнууд дайнд нэрвэгдэх аюултай. Ойрхи Дорнодын зэвсэгт мөргөлдөөн цаашид даамжирч, дэлхийн III дайныг өдөөх болно. Иймээс бослогыг даамжруулах са­наатай байгаа өрнөдийн ор­нуудыг хорлон сүйтгэх үйл ажиллагаагаа зогсоохыг уриалж байна” хэмээв.