Нийслэлчүүд өчигдөр бүх нийтээрээ их цэвэрлэгээ хийлээ.  Самрын яс, модны навч, тамхины ишээр дүүрээд байсан гудамж нэг хэсэгтээ өнгө засав.  Нийслэлийн Захи­рагчийн ажлын алба өнгөрсөн бямба гаригт хий­хээр төлөвлөж байсан ч цаг агаарын тааламжгүй байдлаас болж хойшлуулсан юм. “Хангарьд” ордныхон Сэлбэ гол, Арслантай гүүр­нээс урагш, МУБИС-иас ШУТИС-ийн уулзвар хүртэл, Энхтайвны өргөн чөлөө, баруун дөрвөн замаас “Цэцэг” төвийн уулзвар, V дэлгүүрээс тавдугаар сургууль хүртэлх газрыг цэвэрлэсэн юм. Цэвэрлэгээ хийж буй иргэд их хогтой байгааг хэлж байлаа. Хотын иргэд соёлтой байж, зориулалтын саванд хогоо хаяж занших хэрэгтэй гэдгийг тэд хэлсэн юм. Түүнчлэн нийтийн тээврийнхэн автобус­нуудын эцсийн зогсоолуудыг хур хогноос нь салгалаа. Нийслэлийн хэмжээнд нийт 91 эцсийн зогсоол байдаг аж.

Энэ өдөр шар хантааз­танууд ч амарсангүй. Сүх­баатарын талбайн урд талын цэцэрлэгийг цэвэрлэж байсан иргэдийн нэг Б.Баянтамиртай уулзлаа. Тэрбээр “Хүмүүс маш их хог тарьдаг. Өдөр бүр  цэвэрлээд дийлдэхгүй байна. Би ганцаараа энэ том талбайн талыг цэвэрлэдэг. Цалин маш бага. 15 хоногтоо 60 гаруй мянган төгрөг авдаг. Хүмүүс  цэвэрхэн баймаар юм. Иргэдийн соёлгүй, бүдүүлэг зан хотын хөгжлөөс хойш татаж байна. Зарим иргэд биднийг хог битгий хая гэж хэлэхээр өөдөөс загнаад, зарим нэг нь бүр зоддог. Хүмүүс идсэн самрынхаа ясыг хаа тааралдсан газраа асгачихдаг” гэв.

Түүнчлэн иргэдийн ухамс­рыг дээшлүүлж хотын соёлд суралцуулах хэрэгтэй байгааг тэрбээр хэллээ. Нийслэл хот 372 жилийн ойгоо цэвэр цэмцгэр угтах учиртайг Засаг дарга Г.Мөнхбаяр сануулж байсан. Гэвч зарим хувийн байгууллага цэвэр­лэгээнд орол­цоогүйг хол­богдох мэргэж­лийн хүмүүс шүүмжилж байлаа.