Рок попын оддын “Өгөх өдөр” ТББ-аас хүмүүнлэгийн үйл ажиллагааныхаа талаар мэдээлэл хийлээ. Тэд дэлхийн өгөх өдрийг тохиолдуулан өнгөрсөн жилийн арваннэгдүгээр сарын 1-нийг Монголд анх удаа Үндэсний өгөх өдөр нэрийн дор тэмдэглэн өнгөрүүлсэн юм. Энэхүү ажлын гараагаа “Том болоорой Удвал аа” төслөөр эхлүүлж, хүнд өвчтэй бяцхан охины эмчилгээний зардалд нэмэр болох үүднээс бүх оддын тоглолт зохион байгуулж, хандивын хайрцаг аялуулан, үүрэн телефоны операторуудтай хамтран хандив цуглуулсан билээ. Тухайн үед Монголын ард түмэн бяцхан охин Удвалд хүнд өвчнийг даван туулахад нь зориулан 25 орчим сая төгрөг хандивласан юм. Энэ өдрөөс хойш яг нэг жилийн дараа буюу өнөөдөр Удвал охин энэхүү хэвлэлийн бага хуралд ээжийнхээ хамт оролцсон. Тэрбээр БНСУ-д эмчилгээ хийлгэсэн нь үр дүнтэй болж, бүрэн эдгэрээд, том болоод иржээ.  Удвал охины ээж энэ үеэр “Миний охиныг хүнд өвчнөөс ангижрахад тусалсан Монголын ард түмэн, “Өгөх өдөр” ТББ-ын хамт олонд баярлалаа. Бид бүхэн нэгдэж чадах юм бол өвчин зовлонтой нэгэндээ тусалж чаддаг юм байна гэдгийг харууллаа” хэмээв.
Харин энэ жил Үндэсний өгөх өдрийн хүрээнд гурван ажил хийхээр төлөвлөжээ. Одоогоор хүмүүнлэгийн ажилд 31 сая төгрөг цуглаад байгаа гэнэ. “Wisdom” фильм продакшны хамт олон Үндэсний өгөх өдөрт зориулан дэлгэцэнд гараад удаагүй байгаа  “Бодлын хулгайч” киноны дээжийг буюу бүтэн долоо хоногийн орлого болох 20 орчим сая төгрөгийг хандивлажээ. Түүнчлэн “Мэргэн” бизнес групп 10 сая төгрөг хандивласан бол хүний эрхийн хуульч М.Ичинноров нэг сая төгрөгөөр тусалжээ.
Үндэсний өгөх өдрийн үйл ажиллагаанд цугларсан мөнгөнөөс 20 сая төгрөгөөр нь 25 дугаар тусгай сургуульд суралцаж буй хөгжлийн бэрхшээлтэй сурагчдад хичээлдээ ирж, буцахад нь дөхөм болох үүднээс том оврын автобус бэлэглэх гэнэ. Мөн бөөрний дутагдалтай Г.Баттөр гэж залууд БНСУ-д хийлгэх эмчилгээний зардалд нь тусламж болгон 10 сая төгрөгөө зарцуулахаар хэвлэлийн бага хурлын өмнөхөн шийдсэн тухайгаа “Өгөх өдөр” ТББ-ын гишүүн, Үндэсний өгөх өдрийн үйл ажиллагааны зохион байгуулагчаар ажиллаж буй жүжигчин Б.Амарсайхан дуулгалаа. Мөн тэрбээр “Арваннэгдүгээр сарын 1 хүртэл хугацаа байгаа учир хэрвээ  бидэнтэй нэгдвэл, илүү олон ажил хийхээр төлөвлөсөн” тухайгаа ярьсан юм.