Чингэлтэй дүүргийн газрын мар­гаан иргэдийг ч эрх мэдэлтнүүдийг ч бухимдуулж эхлэв бололтой. Анх 2010 оны  арваннэгдүгээр сарын 17-ны өдөр Нийслэлийн иргэдийн төлөөлөгчдийн хурлын тэргүүлэгчдийн 180 дугаар тогтоол гарч  Чингэлтэй дүүргийн “Тэнгис” кино театрын зүүн талын 0.15 га талбайг эзэмшил, ашиглалтад “олгохгүй” байх тухай заасан байдаг. Нийслэлийн иргэдийн төлөөлөгчдийн хурлынхан 180 дугаар тогтоолоо өдийг хүртэл хүчинтэйд тооцсоор ирсэн гэж байгаа. Гэтэл өнгөрсөн пүрэв гарагаас баасан гарагт шилжих шөнө 30 гаруй бөх “Тэнгис” кино театрын зүүн ард зөвшөөрлийн бичиг баримтүзүүлэлгүй хашаа хатган багагүй хэрүүл, маргаан үүсгээд амжсан. Иргэдийн төлөөлөгчдийн хурлын тэргүүлэгчдийн дарга Т.Билэгтийн 180 дугаар тогтоолд Нийслэлийн 2010 оны газар зохион байгуулалтын төлөвлөгөөнд тусгагдсаны дагуу нийтийн эзэмш­лийн ногоон байгууламж, зам талбай, түүх, соёлын дурсгалт газрыг хамгаалах зорилгоор Улаанбаатар хотын нутаг дэвсгэрт нийтийн эзэм­шилд газар олгохгүй болон барил­га, байгууламж барихыг хориг­лох, газрын байршил хэмжээг хавсрал­таар тогтоосугай” хэмээн заа­сан бөгөөд Улаанбаатар хотын дарга Г.Мөнхбаярт хотын нутаг дэвс­гэрт эзэмшил, ашиглалтанд олгох­гүй болон барилга байгууламж барихыг “хориглосон” газрын байр­шил, хэмжээг нарийвчлан судалж тусгуулах, энэ тогтоолын хэрэг­жилтэд хяналт тавьж ажиллахыг даалгасан. Гэвч хотын даргын гарын үсэгтэй 2011 оны дөрөвдүгээр сарын 7-ны өдрийн “Барилга барих,  газар эзэмших эрх олгох тухай” 296 тоот захирам­жийн хуулбарыг Чингэлтэй дүүргийн газрын албаныхан “Тэнгис” кино театрынхан болон тус дүүргийн тавдугаар хорооны иргэ­дийн өөдөөс харуулаад “инээж” сууна. Уг нь өнгөрсөн долоо хоногт хө­дөө орон нутгаар ажиллаж бай­на гэсэн Чингэлтэй дүүргийн Засаг дарга Д.Ганболд өчигдөр надтай уулзахаар тохирсон боловч энэ асуудлаас хол байхаар шийд­сэн бололтой “бултав”. Улмаар Нийслэлийн газрын албаны дарга Ц.Сандуй Чингэлтэй дүүргийн Засаг дар­гын тамгын газарт 4/0198 дугаар бүхий 360 ам метр бусад 0.0256 /га/ газрыг таван жилийн хугацаатай “Номын сан” байгуулах зориулалтаар эзэм­шүүлэхээр гэрчилгээ гаргажээ. Уг гэрчилгээг 2011 оны долоодугаар сарын 4-ны өдөр гаргасан бөгөөд өө­рийнх нь гарын үсэг байх юм. Уг гэрчилгээний талаар тодруулах гэсэн боловч мөн л “бултав”.  Г.Ган-Билиг мэргэ­­жилтэн ч ажлаа сайн хийж даргын зааварчилгаагаар “Тийм гэрчил­гээг олгосон нь үнэн” гэх товч хариултыг өгөөд бас асуудлаас “бул­тав”. Сүүлдээ өрөөнийх нь гадаа хоёр цаг хүлээсэн боловч ирэх шинжгүй байв.

“Тэнгис” кино театрын  ойр хавийн талбай багагүй хувь нь нийслэлийн харьяанд бай­даг “Тэнгис” кино театрыг анх залуусын чөлөөт цагийг зөв боловсон өнгөрүүлэх орчин үеийн кино театртай болгох зорилгын дагуу байгуулж байсан. Ту­хайн үед Чингэлтэй дүүргийн тавду­гаар хорооны иргэд, цаашлаад их хотын залуус ч баяр хөөр болж энэ шийдвэрийг хүлээж авсан. Гэтэл одоо залуусын чөлөөт цагийг зөв боловсон өнгөрөө­дөг кино театрын эргэн тойронд нэг ч зай талбай үлдэхгүй нь болол­той. Тус кино театрын урд талд нь “Гранд Моторол” ХХК-ийн 4-5 дав­хар үйлчилгээний барилгыг барьж байгаа. Харин зүүн урд талд нь “Усан оргилуур барих гэж бай­гаа” нэрийдлээр 16 давхар оффис бариад гадна үүдэндээ өнөөх “Усан орги­луураа барих” барилгын зураг төсөл, зураг энэ тэр нь гарчихсан хөрсний ажилдаа орсон байдалтай байна” хэмээн иргэд гомдоллож байна. Одоо зүүн ард талд нь “GD” ХХК таван давхар номын сан барих юм байх. Номын сан барих гэдэг нь зүгээр  “Халхавч” л гэсэн  хардлагыг иргэдэд төрүүлээд байна.

Улмаар тус хорооны иргэд асуудал дэвшүүлэн “Т.Билэгт даргын 180-р тогтоолыг яагаад нийслэлийн газрын албаны дарга Ц.Сандуй болон Чингэлтэй дүүргийн газрын албаны дарга Ч.Очир зөрчив. Яагаад хотын дарга Г.Мөнхбаярын гарын үсэгтэй газар олгох захирамж гардаг билээ. Энэ газар нийтийн эзэмшлийн газар” гэх мэтээр олон асуултын хариултыг дээрх нэр дурьдсан дарга нарын амнаас сонсохыг хүсэж байна.  

Чингэлтэй дүүргийн газрын албаны дарга Ч.Очироос энэ талаар лавлахад бухимдалтайгаар “Битгий хотын бүтээн байгуулалтын ажилд саад болоод бай” хэмээн загнасан ч удаа бий гэнэ.