МАН-ын бүлгийн өнөөдрийн хуралдаан өндөрлөлөө. Уг хуралдааны эхэнд Сонгуулийн хуулийн талаар АН-ын бүлгийн саналыг хэлэлцсэн бөгөөд энэ тухай АН-тай дахин ярилцах нь зүйтэй гэж шийдвэрлэсэн байна. Ийнхүү дахин ярих болсон нь Ардчилсан намын санал болгосон 26 мандатыг хүлээн зөвшөөрөх боломжгүй байгаатай холбоотой гэнэ. Энэ талаар МАН-ын бүлгийн ахлагч Ө.Энхтүвшин “2008 оны сонгуулийн нэг алдаа нь намаас нэр дэвшигчид хоорондоо өрсөлдөх нөхцөл үүссэн. 26 мандатыг зөвшөөрвөл мөн л ийм нөхцөл байдал бий болно. Иймд АН-ын гаргаж байгаа саналыг дахин ярилцах хэрэгтэй байна” гэв. Түүнчлэн АН-ын бүлгээс гаргасан “Улаанбаатар хотод нийт сонгогдын 45 хувь нь сууж буй тул нийт мандатын гуравны нэг нь байх тухай” саналыг бас л шууд хүлээн зөвшөөрөх боломжгүй гэж үзжээ. МАН-ын бүлгийн хувьд хүн амын тооноос гадна газар нутгийг харгалзан үзэх ёстой гэсэн нь ийн шийдэхэд хүргэж.

Мөн хуралдаанаар Тавантолгойн орд газрыг ашиглахтай холбогдсон УИХ-ын 39-р тогтоолыг өөрчлөхтэй холбоотой асуудлыг хэлэлцсэн аж. Бүлгийн гишүүд “Аж ахуйн нэгжүүдэд нэрлэсэн үнээр худалдахыг болиулж болох ч иргэдэд яг ямар хэлбэр зориулалтаар тараах тухай асуудал нь тодорхойгүй байна. Иймд энэ талаар илүү тодорхой тооцоо судалгааг харгалзах шаардлага байна” гэж үзээд асуудлын талаар эцсийн шийдвэр гаргаагүй байна.