Төрийн үйлчилгээг иргэдэд хүргэх зорилготой “Төр ба Иргэн” өдөрлөг Өвөрхангай аймгийн Хархорин суманд амралын өдрүүдэд үргэлжиллээ. Энэ үеэр тус сумын Ганган Орхон, Эрдэнэ толгой багийн төвийн нээлт болов. УИХ-ын дэд дарга Г.Батхүүгийн санаачлагаар тус аймгийн иргэдийг УИХ-д төлөөлж буй Ардчилсан намын гурван гишүүн хамтран “Багийн хөгжил” хөтөлбөр хэрэгжүүлж байгаа юм. Уг хөтөлбөрийг хэрэгжүүлэхэд улсын төсвөөс нэг тэрбум төгрөгийн хөрөнгө оруулалт төсөвлөж, 630 сая төгрөгөөр 18 багийн төвийг шинээр барьж буй аж. Мөн 72 сая төгрөгөөр 12 багийн төвийг шинэчлэн засварлаж, 298 сая төгрөгөөр Арвайхээр сумын таван багийн төвийг шинээр барьж байгаа юм байна. Багийн төвүүдийг дулаан сайн хадгалдаг, хямд өртөгтэй, олон жил ашиглах бололцоотой канад барилгын технологиор барьжээ. Хархорин сумын хувьд гурван багийн төвийг шинээр барьж байгаа аж.

Багийн төв бол Монгол Улсын засаг захиргааны анхан шатны нэгж, иргэдэд хамгийн ойр байдаг. Иймээс төрийн түшээгийнхээ хувьд ч , Монголын баг, сумдын үндэсний холбооныхоо шугамаар ч багийн хөгжлийн төлөө хичээж ажиллана гэдгээ УИХ-ын дэд дарга Г.Батхүү хэлсэн юм. Мөн тэрбээр багийн Засаг дарга нарт зөөврийн компьютер өглөө.

Ганган Орхон багийн Засаг дарга Д.Ганхуяг, “Би 1996 оноос хойш багийн даргаар ажиллаж байна. Манай баг 878 өрхтэй, 2870 гаруй хүн амтай. Иргэд ямар нэг асуудал тулгарахад хамгийн түрүүнд багийн даргадаа ханддаг. Багийн дарга үйл ажиллагаа явуулахад тоног төхөөрөмж хэрэгтэй байдаг. Харин өнөөдөр ийм сайхан байртай, зөөврийн компьютертэй боллоо. Багийнхаа иргэдийн өмнөөс баяртай байна” гэв. Түүнчлэн Эрдэнэ толгой багийн Засаг дарга Б.Бямбацэрэн “Манай баг 920 өрх, 3294 хүн амтай. Багийн иргэд сумын ЗДТГ-т очиж төрийн үйлчилгээ авдаг байсан. Нэлээн хол, нэг км шахам зайтай. Харин багийн төв байртай болсноор иргэдэд үйлчлэхэд дөхөмтэй юм” гэлээ.

УИХ-ын дэд дарга Г.Батхүү Өвөрхангай аймагт үргэлжлүүлэн ажиллаж байна.