Энэ долоо хоногт ихэнх нутгаар хур тунадас орж, хүйтрэх боловч ирэх долоо хоногоос дулаарах аж. Маргааш говийн нутгаар, нөгөөдөр баруун болон төвийн нутгийн хойд хэсгээр цас орно. Алтайн салбар уулсаар ирэх лхагва гаригаас эхлэн салхи секундэд 16 метр хүрч ширүүсэх төлөвтэй байгаа аж. Алтай, Хангай, Хөвсгөл, Хэнтийн уулархаг нутгаар шөнөдөө 9-14 хэм хүйтэн, өдөртөө гурван хэмийн хүйтнээс хоёр хэм дулаан байх юм. Харин Алтайн өвөр говь болон говийн өмнөд хэсгээр шөнөдөө хоёр хэм хүйтнээс гурван хэм дулаан, өдөртөө 8-13 хэм дулаан байна. Бусад нутгаар шөнөдөө 4-9 градус хүйтэн, өдөртөө 5-10 градус дулаан байна хэмээн Ус, цаг уурын хүрээлэнгээс мэдээллээ. Харин ирэх долоо хоногоос эхлэн харьцангуй дулаарах төлөвтэй байгаа аж. Ирэх сард агаарын хэм олон жилийн дунджаас 0,5-1 хэмээр дулаан байх бололтой.