УИХ-ын гишүүн Н.Батбаяр, Ц.Батбаяр, Д.Балдан-Очир, С.Эрдэнэ, Л.Ганхуяг, Б.Бат-Эрдэнэ, Ц.Шинэбаяр, З.Энхболд, Ц.Даваасүрэн нар Ерөнхий сайдыг огцруулах шаардлагаа УИХ-ын дарга Д.Дэмбэрэлд өчигдөр чуулганы нэгдсэн хуралдааны танхимд өргөн барив. Гэсэн ч эрхэм гишүүдийн Засгийн газар, Ерөнхий сайдыг огцруулах төлөвлөгөө амжилт олох нь гэсэн дүр зураг огт харагдахгүй байна. Тэд Оюутолгойн гэрээнд өөрчлөлт оруулах, УИХ-ын 57 дугаар тогтоолд заасанчлан Монголын талын эзэмших хувийг 50 болгох шаардлагыг Засгийн газарт тавьсан цагаасаа эхлэн  “Нэр бүхий 20 гишүүн” хэмээн цоллуулж, хэвлэлийн хурал хийсэн ч бүрэн бүрэлдэхүүнээрээ явдаг байв.  УИХ-ын гишүүн Н.Батбаяр тэднийг удирдан зангидаж, зохион байгуулж буй. Бас Засгийн газар шаардлагыг нь хүлээж аваад “УИХ-ын 57 дугаар тогтоолыг биелүүлсэн” гэсэн хариултыг өгсөн нь эрхэм гишүүдийн эгдүүцлийг хүргэн  “УИХ-ын гишүүдийн шаардлагыг биелүүлээгүй, гадны аж ахуйн нэгжтэй нийлж “УИХ-ын тогтоолыг биелүүлсэн гэсэн мэдэгдэл хийсэн Засгийн газрыг огцруулах шаардлага тавина” гэлцэж байв. Харин ингэж хэлээд нэг их удаагүй байтал нэр бүхий 20 гишүүний  зарим нь “Гэрээнд өөрчлөлт оруулах гэснээс бус Засгийн газрыг огцруулах гээгүй” гээд гарч одсон аж. Товчхондоо “Би ерөөсөө болилоо” гэсэн хэрэг. Ийнхүү тоо нь цөөрсөөр шаардлагыг есөн гишүүн өргөн барьсан нь энэ юм. Ямартай ч 20 гишүүнээс хоцорч үлдсэн есөн гишүүн санал, шаардлагаасаа ухарсан ангийн нөхдөдөө сэтгэл дундуур байгаа юм билээ. Бас Ерөнхий сайдыг огцруулах шаардлагыг УИХ-аар хэлэлцсэн ч дэмжлэг авч чадахгүй гэдэгтэй хэдийнэ эвлэрээд байгаа ажээ. Нэг ёсондоо Н.Батбаярын ээлжит жүжиг амжилт олохгүй нь тодорхой болжээ.

Н.Батбаяр гишүүн шаардлагыг өргөн бари­хаа­саа өмнө Д.Дэмбэрэл даргад шаардлагаа өгөх хүсэлт тавихад “УИХ-ын дэд дарга Г.Батхүүд өгчих” гэсэн. Ингээд Г.Батхүү даргыг цаг гаруй хүлээсэн ч ирсэнгүй. Тиймээс чуулганы танхимд орж өгөхөөс өөр арга үлдсэнгүй” гэж байв. Нэр бүхий есөн гишүүн Ерөнхий сайдыг огцруулах шаардлагаа Монгол Улсын Үндсэн хуулийн 25.1.6,  УИХ-ын тухай хуулийн 7.1.12 гэсэн заалтыг үндэслэн тавьжээ. Эдгээр заалтад “УИХ-аас томилсон, сонгосон албан тушаалтныг УИХ-аас огцруулах санал тавих эрхтэй” гэсэн агуулга байгаа аж. 20 гишүүний тоо цөөрч ес болсон нь “Засгийн газрыг огцруулах асуудлыг гишүүдийн дөрөвний нэг нь албан ёсоор тавьж болно” гэсэн Үндсэн хуулийн заалтыг урдаа барих боломжгүй болгосон юм. Харин дээр дурьдсан хуулийн заалтуудыг үндэслэн Ерөнхий сайд гэсэн албан тушаалтныг огцруулах саналыг УИХ-ын нэг гишүүн ч тавьж болох эрхтэй байдаг аж. Шаардлагад гарын үсэг зурсан гишүүд “Ерөнхий сайд Үндсэн хуулийн 41.1-д заасан “Ерөнхий сайд нь Засгийн газрыг удирдаж, төрийн хууль биелүүлэх ажлыг УИХ-ын өмнө хариуцна” гэсэн заалтыг зөрчсөн” гэж үзэж байгаа ажээ.  УИХ-ын дарга Д.Дэмбэрэл тэдний шаардлагыг төдийлөн ойшоохгүй, ширээн дээрээ шидэж байгаа харагдсан. Харин УИХ-ын Тамгын газрын ерөнхий нарийн бичгийн дарга Ц.Магнайсүрэнгээс гишүүдийн шаардлагыг хэлэлцэх үндэслэл бий эсэхийг тодруулахад “Үндсэн хуульд УИХ-ын гишүүдийн дөрөвний нэг нь албан ёсоор Засгийн газрыг огцруулах асуудал тавих юм бол хэлэлцэж шийдвэрлэнэ гэсэн заалт бий. Ерөнхий сайдыг огцруулах тухайд ч гэсэн. Үндсэн хуульд зааснаар Ерөнхий сайдыг дангаар нь огцруулах үндэслэл байхгүй. Гэхдээ шаардлагатай нарийн танилцаж чадаагүй болохоор хэлж мэдэхгүй байна” гэлээ.