Ливийн удирдагч, хурандаа Муаммар Каддафи Сирт хот руу хийсэн дайралтын үеэр алагдсан тухай BBC агентлаг мэдээллээ. Түүний буудуулан нас барсан зургийг Аль-Жазира телевизээр харуулсан байна. Хурандааг буудсан гэх залуу алтан гар буу үзүүлэн ихэд бахдалтайгаар зогсох ба уг алтан гар буу Муаммар Каддафигийнх байсан аж.
Муаммар Каддафи алагдсан тухай албан ёсны мэдэгдлийг Ливийн Үндэсний шилжилтийн зөвлөлийн тэргүүлэгчдийн нэг ерөнхий сайд Махмуд Жибриль хийсэн бөгөөд “Шинэ ардчилсан Ливи улс”-ыг тунхаглаж буйгаа зарлажээ.
Дарангуйлагчаа алагдсан мэдээг Ливийн ард иргэд баярлан хүлээж авч агаарт хий буудан, машиныхаа дуут дохиог хангинуулан, гудамж талбайдаа гарч ирцгээсэн байна.
Ийнхүү найман сарын турш үргэлжилсэн босогчдын тэмцэл ялалтаар өндөрлөлөө.
Н.Наран
