Буурал Европийн хөлбөмбөгийн холбооны хамгийн нэр хүндтэй тэмцээн Аваргуудын лигийн гуравдугаар тойргийн E, F, G, H хэсгийн тоглолтууд өнгөрсөн шөнө болж, өндөрлөлөө.

Английн “Челси” талбайдаа сулхан өрсөлдөгч Бельгийн “Генк”-ийг хүлээн авч, 5:0-ийн харьцаатай бут ниргэлээ. Энэ тоглолт ерөнхийдөө “Челси”-гийн хожлоор өндөрлөх нь тодорхой байсан. Дасгалжуулагч Виллаш Боаш ирснээр формоо олж буй Фернандо Торрес энэ тоглолтод 11 болон 27 дахь минутад хоёр гоол оруулснаар дубль хийсэн нь “Челси”-гийн бут ниргэснээс ч илүү олны анхаарлыг татжээ.

Энэ хэсгийн Германы “Байер Ливеркузен” талбайдаа Испанийн “Валенсия” багийг 2:1-ийн харьцаатай буулган авч, гурван оноогоо авчээ. 

Челси – Генк – 5:0
Гоол: Раул Мейрелеш /8/, Торрес /11, 27/, Иванович  /42/  Калу /72/

Байер – Валенсия – 2:1
Гоол: Жонас /24/,  Шюррле /52/ – Сэм /56/ 

Зуны солилцоо наймааны цонхоор багийн лидерүүдээ алдсан “Арсенал” Францын “Марсель” багийн талбайд зочлон, шүүгчийн мэдлийн цагт буюу 90+2 дахь минутад орсон Рамсигийн гоолоор хожлоо. Рамси 78 дахь минутад Аршавинаар сэлгээгээр талбайд гарсан юм.

Энэ хэсгийн нөгөө тоглолт Грекийн “Олимпиакос” талбайдаа өнгөрсөн жилийн Германы лигт хамгийн залуу бүрэлдэхүүнтэй түрүүлсэн “Боруссия Дортмунд”-ыг хүлээн авч, 3:1-ийн харьцаатай хожжээ. 

Марсель – Арсенал – 0:1
Гоол: Рамси /90+2/

"Олимпиакос – Боруссия Дортмунд – 3:1
Гоол: Холебас /8/, Жеббур /40/, Модесто /78/ – Левандовски /26/

Украйны “Шахтар” талбайдаа Оросын Санкт-Петербург хотын “Зенит” багтай 2:2-ийн харьцаатай тэнцэж, “ хуучин нийгмийн андын ёсоор” оноо хуваалцлаа. Тоглолтын 10 дахь минутад “Зенит” болон Оросын шигшээ багийн хагас хамгаалагч Широков пеналти алдсанаар багийнхаа гурван оноог хуваалцахад хүргэсэн гэхэд болно. Гэхдээ тэрбээр 33 дахь минутад гоолдож, алдаагаа бага зэрэг “цайруулсан”.

Өнгөрсөн жилийн “Европын лиг”-ийн аварга, Португалийн “Порту” талбайдаа Киприйн “АПОЭЛ” багтай 1:1-ийн харьцаатай тэнцэж, шуугиан тарилаа. Халкын 13 дахь минутад оруулсан гоолоор талбайн эзэд тэргүүлсэн ч ердөө зургаан минутын дараа зочид тэнцүүлжээ. Талбайдаа хожихын төлөө “Порту”-чууд олон боломжийг гаргасан ч, Киприйн багийн хамгаалалтыг давсангүй.

Шахтер – Зенит – 2:2
Гоол: Виллиан /15/,  Широков /33/ – Луиз Адриану /45+1/ , Файзулин /60/

"Порту" – АПОЭЛ – 1:1
Гоол: Халк /13/ – Аилтон Алмейда /19/

Хоёрдугаар тойрогтоо учраа таарч, оноо хуваалцсан Испани, Италийн лигийн аваргууд энэ удаа хэсгийн сулхан өрсөлдөгчдөө талбайдаа хүлээн авсан. Испанийн “Барселона” Чехийн “Виктория Плзен” багийг 2:0-ийн харьцаатай хожлоо. “Барса”-гийн хөгжөөэ дэмжигчид олон гоолыг хүлээж байсан ч Иньеста 10, Давид Вилья 82 дахь минутад гоол оруулсан юм.

Харин “Аьаргуудын лиг”-ийн долоон удаагийн аварга “АС Милан” Белорусийн аварга “БАТЭ”-г хүлээн авч мөн 2:0-ийн харьцаатай хожлоо. Энэ хэсгийг долоон оноотой “Барса”, “Милан” багууд тэргүүлж байна. Нөгөө хоёр баг тус бүр нэг оноотой байна. 

Милан – БАТЭ – 2:0
Гоол: Ибрагимович /33/,  Боатенг /70/ 

Барселона – Виктория – 2:0  
Гоол: Иньеста /10/,  Вилья /82/ 

Гурван тойргийн дараах байдлаар мэргэн буучийн жагсаалтыг “ЦСКА” багийн Сейду Думбья дөрвөн гоолтой тэргүүлж байна. Гурван гоолтой “Базель”-ийн Александр Фрей, “Зенит”-ийн Широков, “Барса”-гийн Давид Вилья нар түүний ард бичигдэж байна. 

Аваргуудын лигийн дөрөвдүгээр тойргийн тоглолтууд ирэх сарын 1, 2-нд үргэлжилнэ.