Шведийн нийслэл Сто­кольм хотын хажууханд байх Юурдбруд гэх хотын ний­тийн хоолны үйлдвэрт шалгалт хийсэн байна. Энэхүү шалгалт нь нийтийн хоолны чанар, стандартын шалгалт байсангүй. Харин хууль бус иргэдийг баривчлан  саатуулах кампанит ажил байсан аж. Энэ шалгалтаар тус улсад амьдрах албан ёсны визгүй гадаадын 32 иргэнийг саатуулсан бө­гөөд тэдний дунд мон­голчууд байсан гэнэ. Тэдний ажилладаг нийтийн хоолны үйлдвэрийг “Eat Food Factory Europe AB” гэдэг юм байна. Уг үйлдвэр Шведийн агаарын тээврийн “Sas” компани, “SJ” төмөр зам, “Coop”, “Lidl” зэрэг томоохон аж ахуй нэгжүүдэд бутерброд, хөнгөн зууш нийлүүлдэг аж.  Бас Скан­динавын орнууд дотроо л томд ордог үйлдвэр гэж байгаа. Манай хэдэн монголчууд үнэ­хээр мундаг байна аа. Тэр том үйлдвэрт ажиллаад туршлага хуримтлуулаад, өөрийн гэсэн мэдлэгийг олж авч чадаж байна шүү дээ. Ямар ч байсан Монголд хэ­рүүл хийгээд байдаг хэдэн жагсагчдаас л арай дээр бай­на. Мөн Өмнөд Со­лонгост ажиллаж байгаа олон мянган монголчуудыг мар­таж болохгүй. Байшин ба­рихаас авахуулаад хүний гэрт үйлчлэгч, гахай маллагч, хүүхэд асрагч гээд хийхгүй ажил гэж манайханд алга. Японд ажиллаж амьдарч бай­гаа монголчуудыг ч би­шир­мээр. Нийтийн хоолны газар зөөгч хийхээс авахуулаад, мэргэжлийн сумод нь хүртэл барилдаж байна шүү дээ. Манай улсыг хүн ам цөөтэй гэж ярьдаг. Бид ч үүндээ итгэчихсэн хүмүүс. Гэтэл гадаадад ажиллаж амьдарч байгаа монголчуудынхаа та­лаар мэдээлэл сонсох бүрт “Бид цөөхөн биш шүү дээ” гэх бодол төрмөөр. Бид улсынхаа эдийн засаг, нийгмийн байр байдалд санаа зовохоосоо илүүтэй гадны орны эдийн засагт түлхүү анхаардаад байгаа шүү дээ. Монголчууд Японд, Өмнөд Солонгост, Шведэд гээд хаана ажиллаж байгаа тэр газартаа баялаг бүтээж байна. Монгол бол яах вэ, тэгэж байгаад болох юм хойно. Гол нь дэлхийн бусад улс шүү дээ, бидний хувьд. Японы мэргэжлийн сумогийн дэвжээнд барилдаж байгаа манай хэдэн бөхчүүд бол Монголын үндэсний бөх гэхээсээ илүүтэй Японы үндэсний сумо бөхийн спор­тод л илүү санаа зовж байна шүү дээ. Монгол яах вэ, байж л байна. Гол нь дэлхийн улсуудыг л хөгжүүлэх хэрэг­тэй. Тэнд л баялаг бүтээх нь бидэнд дэндүү ашигтай харагдаж байна.