Английн “Премьер лиг”-ийн наймдугаар тойргийн тоглолтууд Их Британи арлын хамгийн хүчирхэг дерби тоглолтын “сүүдэр дор” болж, өндөрлөлөө. Гэмтлээс эргэн ирж, гараанд багтах болсон Стивен Жеррард тэргүүтэй “Ливерпуль” талбайдаа лигийн хамгийн хүчтэй өрсөлдөгч “Манчестер Юнайтед”-ыг хүлээн авч, 1:1 харьцаатай тэнцэв. Цагтаа энэ хоёр багийн тоглолтыг “Английн аварга шалгаруулах тэмцээн” гэж нэрлэдэг байжээ. Дерби гэсэн утгаараа тоглолт эхнээсээ довтолгооноос довтолгоонд шилжсэн ширүүн болсон ч эхний үе гоол орсонгүй. Хөгжөөн дэмжигчдийн хүсэн хүлээсэн гоол нэлээн төгсгөл рүү буюу 68 дахь минутад орсон. “Ливерпуль” багийн энэ зуны солилцоо наймааны хамгийн оновчтой нь гэгдээд буй Чарли Адамсыг “МанЮ”-гийн хамгаалагч Рио Фердинанд алдаа гаргасан гэж шүүгч зааж, хаалттай цохилт гүйцэтгэх эрх “Ливерпуль” авлаа. Хаалттай цохилтыг багийн ахлагч Жеррард гүйцэтгэн, гоолдсоноор тэргүүлж эхэлсэн. Энэ гоол Жеррардын “Энфилд”-д оруулж буй 50 дахь гоол болжээ. Үүний дараа Сэр Алекс Фергусон довтолгоогоо улам нэмж, “Чичарито” буюу Хавьер Эрнандезийг талбайд гаргасан юм. Тоглолтын 80 дахь минутад “МанЮ” булангийн цохилт амжилттай болж, сэлгээгээр гарсан Эрнандес гоол оруулж, тэнцүүлжээ.   

Гоол: Жеррард 68’ (1:0), Эрнандес 81’ (1:1).

"Ливерпуль": Пепе Рейна, Келли, Каррагер, Шкртел, Энрике, Лукас (Хендерсон, 57), Адамс, Даунинг, Джеррард, Кюйт, Суарес.

"Манчестер Юнайтед": Де Хеа, Смоллинг, Фердинанд, Эванс, Эвра, Жонс (Эрнандес, 76), Флетчер, Пак Жи Сун (Нани, 69), Гиггз, Янг (Рүүни, 69), Уэлбек.
Энэ тоглолтын дараа Манчестер хотын өөр нэгэн баг “Сити” талбайдаа хүчирхэг “Астон Вилла”-г 4:1-ийн харьцаатай хожиж, 22 оноотойгоор Премьер лигийг тэргүүлж эхэллээ. Тоглолтын эхний 28 дэх минутад булангийн цохилтоос ирсэн бөмбөгийг Мика Ричардсын цээжинд цохин газар унагахад Марио Балотелли унаж татан, нэгэн гоёмсог гоолыг оруулав. Нэгдүгээр хагас үүнээс өөр гоолгүй “Сити”-гийн тэргүүллээр өндөрлөлөө. Харин хоёрдугаар хагасын 47 дахь минутад Англи хэв маягийн бус “өвөрмөц” тоглолттой гэгддэг Адам Жонсон мөн л булангийн цохилтоос ирсэн бөмбөгийг тогтоон хаалганд цохин гоолдлоо. Улмаар “Сити” багийн ахлагч Винсент Компани 52, Жеймс Милнер 71 дэх минутад гоол оруулснаар тоглолтын хувь заяаг шийдсэн юм. Харин зочдоос 65 дахь минутад Стефен Уарнок гоолдон, багтаа нэр төрийг авчирчээ.

Энэ жил Английн Премьер лигийг Манчестер хотын багууд гайхалтай эхлүүлж байна. Тэд есдүгээр тойрогт “Улаан чөтгөрүүд”-ийн “Мөрөөдлийн театр”-т тулна.

Бусад тоглолтын хувьд шуугиан гарсангүй. “Арсенал” талбайдаа “Сандерлэнд”-ийг 2:1-ийн харьцаатай буулган авахад багийн ахлагч ван Перси хоёр гоолоор “дубль” хийжээ. Харин хойт Лондонгийн өөр нэгэн баг болох “Тоттенхэм”, “Нью Касл”-ийн талбайд зочлон, 2:2-ийн харьцаатай тэнцжээ.

“Ливерпуль” 1 – 1 “Манчестер Юнайтед”
“Манчестер Сити” 4 – 1 “Астон Вилла”
“Норвич Сити” 3 – 1 “Свонси Сити”
“Квинс Паркер Рэйнжерс” 1 – 1 “Блекбэрн”
“Стоке Сити”  2 – 0 “Фулхэм”
“Уиган” 1 – 3 “Болтон”
“Челси” 3 – 1 “Эвертон”
“Вест Бромбич” 2 – 0 “Волвес”
“Арсенал” 2 – 1 “Сандерлэнд”
“Нью Касл” 2 – 2 “Тоттенхэм”